«Մենք հեղափոխության մեջ ենք գտնվում ոչ թե վերջին 4-5 օրը, այլ տարիներ շարունակ: Գրեթե ամեն տարի Հայաստանը ցնցվում է և հայտնվում է եթե ոչ՝ հեղափոխության, ապա գոնե պետական հեղաշրջման եզրին»,- «Առաջին լրատվական»-ի հետ զրույցում ասաց կինոռեժիսոր Տիգրան Խզմալյանը՝ գնահատելով այս օրերին Հայաստանում տեղի ունեցող գործընթացները:
Պետությունը համեմատելով ընտանիքի հետ՝ Խզմալյանն ասաց. «Բռնաբարության միջոցով ընտանիք ստեղծել հնարավոր չէ: Հարսին ուժով կարելի է հնազանդեցնել, բայց եթե չկա սեր, եթե չկա հարգանք…»:
Մեր զրուցակցի խոսքով՝ արյունով արյունը չի լվացվում, և վիշապին սպանողը դառնում է վիշապ. «Շատ լավ է, որ Նիկոլ Փաշինյանը այդքան իմաստնություն է ձեռք բերում՝ կիրառելով զուտ խաղաղ քաղաքական տեխնոլոգիաներ: Կոչ անելով բռնության չդիմել՝ նա ստիպում է իշխանությանը բռնության դիմել»:
Տիգրան Խզմալյանի համոզմամբ՝ որ իշխանությունները չեն գործում իրենց սովետական ռուսական ոճով, և որ մինչ այժմ տանկերը մեր վրայով չեն անցել, դրա համար կա մեկ պատճառ. «Լրատվամիջոցները և հիմնականում՝ արևմտյան լրատվամիջոցները: Իշխանություններն առայժմ խոհեմություն են ձեռք բերում և արյուն չեն թափում»:
Անդրադառնալով Սերժ Սարգսյանի վերջին հարցազրույցին՝ Տիգրան Խզմալյանը կարծիք հայտնեց, որ ներկայիս վարչապետը հոգու խորքում ուրախանում է այս ամենի համար.
«Որովհետև շատ լավ հասկանում է, որ Հայաստանը փրկելու համար մենք պետք է թոթափենք ռուսական լուծը: Սերժ Սարգսյանը, սակայն, այլևս չի օգնում մեզ, այլ միայն խանգարում է: Նա կորցրել է ժամանակ, ինչը անդառնալի է»:
Մանրամասները՝ տեսանյութում:
