Չեմպիոնների լիգայի գավաթի խաղարկության խմբային փուլի 5-րդ տուրի իտալական «Նապոլի»-ի հետ մրցավեճում իրեն ամենալավ կողմերով դրսևորեց Դորտմունդի «Բորուսիա»-ի ու Հայաստանի ազգային հավաքականի կիսապաշտպան Հենրիխ Մխիթարյանը:
Այդ մրցավեճում, հիշեցնենք, դորտմունդցիները հաղթանակ տոնեցին 3:1 հաշվով: Ճիշտ է, Մխիթարյանն այդ խաղում չդարձավ գոլի կամ գոլային փոխանցման հեղինակ, բայց ցուցադրած փայլուն ֆուտբոլի շնորհիվ արժանացավ ֆուտբոլային աշխարհի գովասանքին: Ձեր ուշադրությանն ենք ներկայացնում «Բորուսիա»-ի երկրպագուական կայքերից մեկի հոդվածը` հայ ֆուտբոլիստի մասին:
«Ֆուտբոլիստից, ով արժե 27,5 մլն եվրո, յուրաքանչյուր մրցավեճում միշտ ինչ-որ առանձնահատուկ բան են սպասում: Դա նաև Հենրիխ Մխիթարյանի դեպքում է, ով համարվում է ակումբի պատմության ամենաթանկ ձեռքբերումը ու եկել է Մարիո Գյոտցեի փոխարեն: «Նապոլի»-ի նկատմամբ տոնած հաղթանակը նրա համար ոչ միայն թիմային հաջողություն էր, այլև օգնություն անձամբ իր համար:
Մխիթարյանը հանդիպման գլխավոր հերոսներից էր: Նա հիանալի կատարեց իր պարտականությունները` ազատվելով ավելորդ լարվածությունից: 24-ամյա ֆուտբոլիստին վերջին շրջանում շատ էին քննադատում ակումբի երկրպագուներն ու մամուլը: «Ես հուզմունք էի զգում խաղից առաջ, քանի որ շատերն արդեն սկսել էին քննադատել ինձ»,- ասում է Մխիթարյանը:
«Ես երբեք չեմ հանձնվում»
Խաղացողներին, ովքեր փայլուն վարպետություն ունեն, անհրաժեշտ է նաև վստահություն սեփական ուժերի նկատմամբ, որպեսզի նրանք խաղադաշտում հանդես գան այնպես, ինչպես կարող են: Վերջին շաբաթները հեշտ չէին Մխիթարյանի համար: Նրա մոտ շատ էին անհաջող փոխանցումները, կորել էր վստահությունը, իսկ պահանջները մեծ են: «Չեմ կարող ասել, թե ինչ էր տեղի ունենում: Հիմա անչափ ուրախ եմ, որ վերջապես դուրս եկա այդ ճգնաժամից»,- ասում է Մխիթարյանը: Ու «ժգնաժամ» բառը նա գիտակցաբար է արտասանում, այլ ոչ թե փորձում է իր խոսքը տանել այլ ուղղությամբ:
Մխիթարյանը ոչինչ չի կարող անել, որ «Բորուսիա»-ն իր տրանսֆերի համար ռեկորդային գումար է վճարել, բայց նա նաև գիտի, որ դա մեծացնում է իր առջև դրված պահանջներն ու իրենից ակնկալիքները: «Ես այնպիսինն եմ, որ երբեք չեմ հանձնվում: Միշտ պատրաստ եմ դառնալ ավելի լավն ու փորձում եմ աշխատել ինձ վրա»,- ասում է նա:
Դիտարժան խաղ
Հենրիխը գիտեր, թե ինչպես էր պետք գործել թիմի հակագրոհների ժամանակ: Ազատությունը, որը նկատվում էր նրա խաղում, ֆուտբոլիստին թույլ տվեց անհատական վարպետության շնորհիվ խաղային որոշ դրվագներում ավելի շատ դիմել իր տեխնիկայի օգնությանը:
Գնդակով շատ արագ շարժվելու կարողությունը երեքշաբթի օրը նրա օգտին աշխատեց: Միայն այն պահի համար, երբ Մխիթարյանը միայնակ անցավ «Նապոլի»-ի ամբողջ պաշտպանության միջով ու հասցրեց ձախ ոտքով հարված կատարել Ռեյնայի դարպասին, արժեր այս խաղի տոմս գնել: Այդ պահը շատ նման էր «Շալկե»-ի հետ հանդիպման 3-րդ գոլի դրվագին: «Այսօրվա խաղն ինձ համար լավագույնն էր «Բորուսիա»-ի կազմում»,- ասում է Մխիթարյանը:
Կայուն խաղ
Եվ այժմ շատ է խոսվում, որ Մխիթարյանը կամաց-կամաց գտնում է իր խաղը: Նա մի քանի հանդիպումներում ակնարկել է իր մեծ պոտենցիալի մասին. Ֆրանկֆուրտում նա միայնակ հաղթանակ բերեց իր թիմին, «Համբուրգ»-ի հետ մրցավեճում էլ վատ չխաղաց: Ֆուտբոլիստը հուսով է, որ դժվարին շրջանն իր համար ավարտված է: «Ես ցանկանում եմ կայուն լավ ֆուտբոլ ցուցադրել»,- ասում է Հենրիխը:
Մեկ բան պարզ է. այն քննադատներին, ովքեր կարծում էին, որ Մխիթարյանը չի համապատասխանում «Բորուսիա»-ին, նա համարժեք պատասխան տվեց»:
