«Հանրապետականների որոշ պատգամավորների «ձեռքն է ընկել» համամասնական նախընտրական մի ցուցակ, որը բուռն քննարկումների և «ռազբորկաների» առարկա է դարձել ՀՀԿ-ում»,- գրում է թերթը և հավելում. «Ինչպես փոխանցում են ՀՀԿ մեր աղբյուրները, սույն ցուցակում հին հանրապետականներից գրեթե ոչ մեկի անունը չկա: Ցուցակում չկան նաև օլիգարխ պատգամավորների անունները: Փոխարենը, ըստ նույն աղբյուրների, ցուցակում ընդգրկված են երիտասարդների անուններ, որոնք, բնականաբար, Սերժ Սարգսյանի փեսայի՝ Միքայել Մինասյանի շրջապատը ներկայացնող անձինք են»: Ըստ թերթի տեղեկությունների՝ նախընտրական սույն ցուցակը գլխավորում է Ազգային ժողովի նախագահ Հովիկ Աբրահամյանը:
Երեկ, երբ թերթը փորձել է հին ՀՀԿ-ականներից պարզել, թե ինչպես են նրանք վերաբերվում այդ ցուցակին, վերջիններս հայտարարել են, թե նման ցուցակ չեն տեսել: ՀՀԿ խմբակցության պատգամավոր ՌաՖիկ Պետրոսյանը թերթի հետ զրույցում ասել է. «Ես նման բան չեմ տեսել, որովհետև, եթե լիներ, բացահայտ կասեին, մեզ հետ էլ կխոսեին: Այդպիսի բան չկա»:
«Չի բացառվում, իհարկե, որ նոր երևան եկած ցուցակը ընթացքում որոշ փոփոխությունների ենթարկվի: Մասնավորապես, մեր աղբյուրները չեն բացառում, որ հնարավոր է, ՀՀԿ-ի դեռևս նախնական նախընտրական ցուցակում Հովիկ Աբրահամյանին փոխարինի վարչապետ Տիգրան Սարգսյանը, այսինքն, ցուցակը գլխավորի ոչ թե Աժ նախագահը, այլ վարչապետը: Վերջինիս հետ, սակայն, իշխանության տարբեր ներկայացուցիչներ լուրջ խնդիրներ ունեն, նա անընդունելի է շատերի համար: Այնպես որ, Սերժ Սարգսյանը Հովիկ Աբրահամյանի և Տիգրան Սարգսյանի միջև ընտրություն կատարելիս դեռ պիտի հաշվարկի պլյուսներն ու մինուսները»,- գրում է թերթը և հավելում. «Մի բան ակնհայտ է, որ թեև իշխող ռեժիմի ներկայացուցիչներն օրնիբուն հայտարարում են, թե արտահերթ ընտրություններ տեղի չեն ունենալու, քանի որ դրանց համար ոչ քաղաքական և ոչ էլ իրավական հիմքեր կան, բայց բոլորն էլ ակտիվորեն պատրաստվում են ընտրությունների: Նույն վիճակն է տիրում նաև քաղաքական մյուս ուժերի ճամբարներում, թեև այստեղ նախընտրական ցուցակների մասին տեղեկություններ դեռ չկան: Մասնավորապես, կոալիցիայի երկրորդ ուժը՝ ԲՀԿ-ն, որ այս ընթացքում աշխատել է հնարավորինս զերծ մնալ հրապարակային հայտարարություններ անելուց, խիստ ակտիվացել է սոցիալական ցանցերում։
