Ավստրալիայի ոստիկանությունը Քուինսլենդում հայտնաբերել է անօրինական զենք ու զինամթերքի պահեստ: Այս մասին հայտնում է ABC-ն: Հայտնաբերված պահեստը ճանաչվել է խոշորագույններից մեկը նահանգի պատմության մեջ:
Պահեստը գտնվում է մասնավոր ֆերմայում՝ Մոնտո քաղաքից ոչ հեռու: Այնտեղ պահվել է տարբեր տեսակի 328 միավոր զենք: Բացի այդ, այնտեղ հայտնաբերվել է շուրջ 4 տոննա զինամթերք:
Զենքի միայն մի փոքր հատվածն է գրանցված եղել ըստ համապատասխան օրենքի՝ փոխանցում է Associated Press-ը: Որոշ դեպքերում պահեստում պահվող սպառազինության առարկաները ենթարկվել են մոդիֆիկացիայի:
Ոստիկանությունը գործով ձերբակալել է երեք մարդու՝ 42 և 46 տարեկան երկու եղբայրների և նրանց 69-ամյա հորը: Նրանց դեմ առաջադրվել է զենքի անօրինական պահման մեղադրանք: Հետաքննությունը նոր է սկսվել: Ոստիկանությունում դեռևս չեն հայտնում նման պահեստի տնօրինման դրդապատճառների մասին:
