ՀՀ պաշտպանության նախարար Սեյրան Օհանյանն այսօր անդրադարձել է ԱԺ-ում դրված Հայաստանի և Ռուսաստանի կառավարությունների միջև Ռազմատեխնիկական համագործակցության մասին համաձայնագրին: Նրա խոսքով՝ Ռազմատեխնիկական համագործակցության վերջին համաձայնագիրը զարգացման նպատակ ունի, որը հնարավորություն կտա, օգտագործելով ռազմատեխնիկական համագործակցության հնարավորությունները, ընդլայնել մեր կարողությունները՝ սպառազինության և ռազմական տեխնիկայի նոր և փոխարինելի միջոցներով, ինչպես նաև հնարավորություն կտա, որ մենք զարգացնենք մեր ռազմական արդյունաբերությունը, մեր տեղական կազմակերպություններին, որոնք այդ համաձայնագրով հնարավորություն կունենան ուղղակի կապ հաստատել ՌԴ համապատասխան կազմակերպությունների հետ և գործարքներ կնքել՝ իհարկե համաձայնեցնելով ՊՆ-ի հետ:
Նախարարն ընգծեց, որ մեր զարգացման նպատակը մեկն է՝ այսօր ապահովել Հայաստանի Հանրապետության ԶՈւ-ն առաջին հերթին հեռահար, ճշգրիտ և հատուկ նշանակությամբ սպառազինությամբ, որոնք կարող են կանխարգելել և նաև հատուկ գործողություններ իրականացնել՝ ապահովելու մեր անվտանգությունը և կանխարգելելու մարտական գործողությունները:
Իսկ հարցին՝ ՌԴ-ն շարունակո՞ւմ է ռազմական տեխնիկա մատակարարել Ադրբեջանին, այս դեպքում ի՞նչ է արվում բալանս ապահովելու ուղղությամբ, Սեյրան Օհանյանը պատասխանեց, որ այսօր ամեն ինչ արվում է բալանսը պահպանելու ուղղությամբ:
«Կարծում եմ՝ ՀՀ-ի և ՌԴ-ի ռազմաքաղաքական ղեկավարությունն այսօր ճիշտ աշխատանքներ է տանում, և դրա արդյունքը հաջորդ տարվա ընթացքում կերևա»,- ասաց նա:
Անդրադառնալով՝ ՌԴ 102-րդ ռազմաբազայի առկայությանը՝ նախարարը նշեց, որ այն այսօր ՀՀ ԶՈւ համապատասխան կառույցների հետ իրականացնում է 2010-ի օգոստոսին իր և ՌԴ պաշտպանության նախարարի միջև ստորագրված համաձայնագրի նպատակներն ու խնդիրները՝ ՀՀ անվտանգության ապահովման գործում. «Գիտեք, որ արևելյան հարևանների հետ այսօրվա մեր ԶՈւ-ի կազմով խնդիր չունենք իրականցնելու մեր անվտանգությունը»:
Նախարարը նշեց, որ ՌԴ 102-րդ բազան վերջին տարիներին ձևափոխվել է, օպտիմալացվել և այսօր հասել է այն վերջնական տարբերակին, որ իրենք կարող են մշտական կազմով անհրաժեշտության դեպքում խնդիրներ իրականացնել նաև պատերազմական գործողությունների ժամանակ, նյութատեխնիկական բազայի ապահովում իրականացնել: 102-րդ ռազմաբազան բավականին կազմակերպված է, նոր միջոցներ են ներմուծվել այնտեղ:
Ինչ վերաբերում է այն տարածքներին, որոնք տրամադրված են ռազմաբազային, նախարարը նշեց, որ ավելացում չի լինելու, պարզապես նոր օդուժի ստորաբաժանում է ստեղծվելու և դրա համար Էրեբունու տարածքին կից մենք մեր ԶՈւ հողատարածքներից ենք տրամադրելու:
Նախարար Օհանյանը վերահաստատեց այն, որ Հայաստանի Հանրապետությունը հանդիսանում է Լեռնային Ղարաբաղի անվտանգության երաշխավորը, և Հայաստանի Զինված ուժերն ու Ղարաբաղի Պաշտպանության բանակը միասնաբար ի զորու են պաշտպանել Ղարաբաղի անվտանգությունը:
«ՀՀ Զինված ուժերը և Արցախի Հանրապետության Զինված ուժերը այսօր ի վիճակ ի են դիմագրավել և դեռ ավելին՝ նախահարձակ լինել այն ուժերին, որոնք կան մեր հարևանների մոտ։
Լուսանկարը՝ PanARMENIAN Photo-ի
