Արդյոք Իշխան Զաքարյանը պնդո՞ւմ է, որ Երևանում իր նորակառույց շքեղ առանձնատան կառուցումը ֆինանսավորել է ամերիկահայ գործարար Ալբերտ Բոյաջյանն իր անձնական միջոցներից: Եթե այո, ապա ամերիկահայ գործարարն ինչո՞ւ է ֆինանսավորել Հայաստանի բարձրաստիճան պաշտոնյայի շքեղ առանձնատան կառուցումը` հարցը երեկ ուղղեցինք Վերահսկիչ պալատի նախագահ Իշխան Զաքարյանին: «Դա արդեն…»,- ասաց Ի. Զաքարյանն ու պատասխանը թողեց կիսատ:
Վերջերս մամուլում հրապարակվեցին փաստաթղթեր, որոնց համաձայն Ա. Բոյաջյանը Ի. Զաքարյանին թույլ է տալիս կառավարել իր անձնական հաշիվները: Բայց արդյո՞ք դա նշանակում է, որ ամերիկահայ գործարարն Ի. Զաքարյանին ասել է, որ այդ հաշիվներից մի քանի միլիոն դոլար վերցրու և քո համար առանձնատուն կառուցի: «Հրապարակվել է այն, ինչ-որ կա»,- նորից կարճ պատասխանեց պարոն Զաքարյանը:
Ի. Զաքարյանի շքեղ առանձնատան պատմությունը քաղաքական և լրատվական դաշտում վերջերս արժանացավ բավականին սուր քննադատությունների: Իսկ քննադատությունները հիմնականում հնչում էին այն համատեքստում, թե տարբեր գերատեսչություններում խախտումներ, չարաշահումներ, բյուջետային գումարների յուրացումներ հայտնաբերող ՎՊ նախագահի աշխատավարձը բավարարո՞ւմ է մի քանի մլն դոլար արժողությամբ առանձնատուն կառուցելու համար: Ինքը՝ ՎՊ նախագահը խուսափում է հրապարակավ խոսել այդ մասին, և ընդամենը մամուլում անուղղակիորեն ակնարկել է, թե իր տունը կառուցվել է Ա. Բոյաջյանի միջոցներով: Սակայն հրապարակված փաստաթղթերից պարզ չէ` Ի. Զաքարյանը Ա. Բոյաջյանի հաշիվները կառավարելիս այնտեղից ի՞ր, թե՞ ամերիկահայ գործարարի առանձնատունը կառուցելու համար պետք է գումարներ վերցնի: Հատկապես, որ Ա. Բոյաջյանն էլ իր հարցազրույցներից մեկում ասում է, թե ցանկանում է Հայաստանում տուն կառուցել ու այդ հարցում իրեն օգնում է իր լավ բարեկամ Ի. Զաքարյանը: Այժմ նաև տեղեկություններ կան, որ Ի. Զաքարյանը սկսել է կառուցել երկրորդ տունը՝ այս անգամ Ա. Բոյաջյանի համար:
«Առաջին լրատվական»-ը Ի. Զաքարյանից նաև հետաքրքրվեց` ՎՊ վերջին հաշվետվության աղմկոտ ներկայացումից հետո նա շարունակո՞ւմ է պնդել, որ բյուջեի 70 տոկոսը կոռուպցիոն ռիսկերի տակ է կամ պետական համակարգում համակարգային խախտումներ կան, թե՞ Սերժ Սարգսյանի կողմից հրապարակավ նկատողություն ստանալուց հետո, փոխել է կարծիքը: «Էլ չեմ պատասխանի, վերջ»,- ասաց նա ու հեռացավ:
Ի դեպ, Ի. Զաքարյանը երեկ Ազգային ժողով էր եկել Ֆինանսավարկային և բյուջետային հարցերով մշտական հանձնաժողովի նիստում ՎՊ 2014թ. ծրագիրը ներկայացնելու համար: Ծրագրում ընդգրկված էին 13 հարցեր՝ Առողջապահության, Արտաքին գործերի, Էկոնոմիկայի, Տրանսպորտի և կապի նախարարություններում, Պետեկամուտների կոմիտեում և մի շարք այլ ոլորտներում ստուգումներ իրականացնելու մասին: Նիստից հետո ՎՊ նախագահը լրագրողներին խոստացավ, որ նախկինի նման ոլորտ առ ոլորտ ուսումնասիրություններ կատարելուց և դրանց արդյունքները ՎՊ խորհրդի նիստում քննարկելուց հետո պատասխանելու է լրագրողների հարցերին:
Վերջին ամիսներին, սակայն, Ի. Զաքարյանը հրաժարվում է լրագրողների հարցերին պատասխանելուց: Իսկ նիստի ժամանակ նա միտք հայտնեց, թե գնումների գործընթացում որակը կարևոր է: Լրագրողների դիտարկմանը, թե հայտնի մալուխի պատմությունից հետո նրա տոնայնությունը փոխվել է` ինքը նախկինում ավելի շատ գինն էր կարևորում, Ի. Զաքարյանը պատասխանեց. «Խնդիրը դա չէ, խնդիրը նախահաշիվ կազմելու մեջ է: Երբ որ նույն մալուխը, նույն տախտակը, նույն փայտը, քարը շուկայում արժի X գին, մենք ընդամենը ասում ենք, թե նախահաշվում դրեք այդ գինը: Իսկ մեզ բոլորը բացատրում են, թե մեկը բարձր է դրվում, մյուսը ցածր է դրվում, բայց արդյունքում ինչ-որ մի թվի ենք հանգում: Ասում ենք, որ որոշակի ռիսկեր ենք տեսնում և դնում ենք խնդիր, որ այո, ուսումնասիրեք շուկան, տեսեք՝ ինչ գին է դրված, էդ գինը դրեք»:
Լրագրողները մեկ այլ դիտարկում ևս արեցին` ՎՊ-ն յուրաքանչյուր տարի տասնյակ ոլորտներ է ուսումնասիրում, հսկայական խախտումներ հայտնաբերում, մինչդեռ ընդամենը Սոցապահովության հիմնադրամի նախկին պետ Վազգեն Խաչիկյանն է պատասխանատվության ենթարկվել իր ղեկավարած համակարգում յուրացումներ թույլ տալու համար: Ի. Զաքարյանը չհամաձայնելով՝ պատասխանեց, թե Սևանում նույնպես մի քանի հոգի դատապարտվել են, բայց չմանրամասնեց, թե որ ոլորտում կամ ինչ չարաշահումներ կատարելու համար: «Վերջիվերջո, մենք մոտ 30 գործ ուղարկել ենք դատախազություն, և ոչ մի գործ չի մերժվել: Հարուցվել են քրեական գործեր, վնասներ են վերականգնվել»,- թեման այսպես եզրափակեց ՎՊ նախագահը:
