Այսօր քաղաքական գործիչների և վերլուծաբանների «Վիլնյուսյան գագաթնաժողով. քաղաքական պարտությո՞ւն, թե՞ նոր հնարավորություններ Հայաստանի համար» թեմայով քննարկման ժամանակ բանավեճ ծավալվեց «Համաձայնություն» կենտրոնի ղեկավար Դավիթ Շահնազարյանի և ԱԺ ՀՀԿ խմբակցության քարտուղար Հովհաննես Սահակյանի միջև: Բանավեճը սկսվեց այն ժամանակ, երբ Դավիթ Շահնազարյանը, խոսելով սեպտեմբերի 3-ին կայացված որոշման մասին, ՀՀ պետականության, ինքնիշխանության կորստին հանգեցնելու մեջ անուղղակիորեն մեղադրեց նախագահ Սերժ Սարգսյանին: Իր խոսքում Հովհաննես Սահակյանը փորձեց պատասխանել Դավիթ Շահնազարյանին՝ ասելով, թե այդ որոշումը նոր չէ, որ կայացվել է, այդ որոշումը ոչ այսօրվա, ոչ երեկվա նախագահները չեն կայացրել, այլ թերևս՝ առաջին նախագահը:
«Դուք չեք կարող պատասխանել, թե ինչպես եք հաղթահարելու սահմանադրական արգելքը: Հայաստանը մտնի Մաքսային միություն, լինելու է ՌԴ-ում ՀՀ ռազմաբազայի շրջակա տարածքը»,- նշեց իր ելույթում Դավիթ Շահնազարյանը, ապա հավելեց, որ իշխանությունը նաև ՀՕՊ-ն է հանձնում ՌԴ-ին:
«Երբևէ ՀՀ-ն իր պատմության մեջ չի եղել այնպիսի սպառնալիքի տակ, ինչպիսին հիմա է»,- նշեց Դավիթ Շահնազարյանը:
