Ի պաշտպանություն Շանթ Հարությանյանի նախաձեռնող խմբի անդամ, «Ազատ Հայք» հասարակական-բարեգործական կազմակերպության նախագահ Ռուբեն Մնացականյանն այսօր հրավիրված ասուլիսում նշեց, որ հատվածական մտածողությունը մենք մեր միջից չենք կարողանում հանել. եթե ընթացող գործողությունների ժամանակ Շանթի, մյուս ազատամարտիկների գործողություններին չեն միանա Հայաստանում իրենց քաղաքական երրորդ ուժ համարող ուժերը, նշանակում է՝ իրենց պետք է գամվել անարգանքի սյունին:
Հայաստանի դաշտային հրամանատարների խորհրդի անդամ, ազատամարտիկ Սուրեն Սարգսյանն էլ նշեց, որ միակ շարժումը, որը տարածքային չէ, ազատամարտիկների շարժումն է: «Մենք փորձում ենք բոլորին համախմբել, մենք շատ շատերին հսկում ենք, որ ոստիկան չխփեն, ոստիկան չսատկացնեն: Մենք զսպիչ դեր ունենք. կգա օրը Հայաստանում մեկ տերև անգամ չի շարժվի, և այս ապիկար իշխանությունները կգնան այնտեղ, որտեղ իրենց տեղն է. Ոմանք՝ Կոշի գաղութ, մյուսները՝ համարժեք տեղեր: Իսկ ոստիկանապետը, այն դատավորը, որը հանդգնեց հոգեբուժարան ուղարկել Շանթին, նա է այնտեղ հայտնվելու, և նրանց հոգեբույժները պետք է աշխատեն այդ արարածների վրա, նրանք պետք է սովորեն՝ Աստծո անունը Սերժ Սարգսյան չէ, Աստված է: Ցավում եմ որ դատաիրավական համակարգում մի տղամարդ չգտնվեց. տղամարդկությունը միայն տաբատ հագնել չէ, այն բարձր արժեք է»,- ասաց նա՝ հավելելով, որ հոտի պես համատարած վազ են գալիս Սերժ Սարգսյանի հետևից:
Սուրեն Սարգսյանն ասաց, որ իրենք գիտեն՝ ինչպես խփել ռեժիմի գլխին. ժամանակը կգա, կխփեն:
Շանթը, նրա խոսքով, հեղափոխություն չէր անում, կեցվածք էր դրսևորում: Նա դուրս եկավ, ասաց՝ այլևս այսպես չի կարելի ապրել:
