Եվրանեսթի ԽՎ-ում ՀՀ ԱԺ պատվիրակության և Հայաստանի Արևելյան գործընկերության քաղաքացիական հասարակության ֆորումի համատեղ երկրորդ նիստի ընթացքում քննարկվեցին եվրոպական Արևելյան գործընկերության վերաբերյալ քաղաքացիական հասարակության ֆորումի ներկայացրած առաջարկությունները:
Առաջարկությունները ներկայացված էին չորս խմբով` ժողովրդավարության, մարդու իրավունքների արդյունավետ կառավարման և կայունության ոլորտում, Քաղաքացիական հասարակության ֆորումի քաղաքականությունը Եվրամիության հետ տնտեսական ինտեգրացիայի և մերձեցման ոլորտներում, շրջական միջավայր, կլիմայական փոփոխություններ և էներգետիկ անվտանգության ոլորտում և հարաբերություններ մարդկանց միջև:
«Ուրբան» հիմնադրամի անդամ Արմինե Թուխիկյանը ներկայացրեց իրենց առաջարկությունները տեղական ինքնակառավարման մարմիններում իրական ժողովրդավարության կայացմանը: Նա հիշեցրեց, որ Հայաստանը վավերացրել է ՏԻՄ լրացուցիչ խարտիան, սակայն այն այդքան էլ չի իրականացում: Թուխիկյանի խոսքերով՝ պետք է անել հնարավորը տեղական ինքնակառավարման հարցերում ժողովրդի մասնակցության հարցը բարձրացնելու համար:
Հայաստանի ազգային պլատֆորմի համակարգող խորհրդի անդամ Մարինե Մայիլյանը ներկայացրեց «Քաղաքացիական հասարակության ֆորումի քաղաքականությունը Եվրամիության հետ տնտեսական ինտեգրացիայի և մերձեցման ոլորտներում» առաջարկները: Նա նկատեց, որ պետության և մասնավոր սեկտորի միջև փոխվստահություն ձևավորելու համար պետք է ապահովել կայուն և շարունակական երկխոսություն, ինչը Հայաստանում չկա, լավագույն դեպքում դա տեղեկատվություն տրամադրելու մակարդակի վրա է գտնվում: Նա նշեց, որ շատ կարևոր է զարգացնել պետական մասնավոր կառուցողական գործընկերությունը, որը, ներկայանալով որպես մեխանիզմ ձևավորելու վստահելի մթնոլորտ, երկրում կնպաստի և՛ ներդրումներին, և՛ ժողովրդավարության երաշխավոր համարվող միջին խավի ձևավորմանը:
Ազգային պլատֆորմի համակարգող խորհրդի անդամ Թևան Պողոսյանը, ներկայացնելով առաջարկությունների երրորդ փաթեթը, նշեց, որ էներգետիկ անվտանգության վերաբերյալ հարցերին շատ քիչ են անդրադառնում: Էներգետիկ անվտանգության խնդիրների ոլորտից նա մասնավորապես անդրադարձավ Մեծամորի ատոմակայանի խնդրին, տարածաշրջանով անցնող նավթագազամուղներին, տարածաշրջանային գետերին. «Կարծում եմ, ապագայում պետք է տեղի ունենա աշխարհագրության բաժանում: Քուռ և Արաքս գետերի ավազանում առկա է օգտագործվող ջրի մաքրության խնդիրը: Մեր տարածաշրջանում ջուրն ի սկզբանե ձևավորվում է Թուրքիայի տարածքում, հետո հոսում է Հայաստան, Վրաստան, Ադրբեջան, իսկ Թուրքիան չի միանում ջրի մաքրության պաշտպանության վերաբերյալ շատ ու շատ միջազգային կոնվենցիաների, քանզի այդ դեպքում ամենաշատը պետք է վճարի ջրի աղտոտման համար, ինչն էլ մեծ դժվարություններ է ստեղծում»:
«Հարաբերություններ մարդկանց միջև» առաջարկների խմբին անդրադառնալով՝ Թևան Պողոսյանը նկատեց, թե ճիշտ է, որ Եվրանեսթում այս ոլորտն առանձնացված է: Պողոսյանը կարևորեց մշակութային ժառանգության ներկայացման հարցը, նկատեց, որ Հայաստանը պետք է իրեն պատկերացնի եվրոպական մշակույթի շրջանակներում, և կարևորեց մշակութային համատեղ ժառանգության գաղափարը:
Եվրանեսթում ԱԺ պատվիրակության ղեկավար Վահան Հովհաննիսյանը տեղեկացրեց, որ հունիսի 21-ին լինելու է Եվրանեսթի բյուրոյի նիստը, որտեղ քննարկվելու է նիստի օրակարգը, և հենց այնտեղ է որոշվելու՝ որ հարցերով զեկույցներ ունի հայկական կողմը, և, ընդհանրապես, որ հարցերով կան զեկույցներ: Հովհաննիսյանը նկատեց, որ ցանկացած զեկույցի դեպքում իրավիճակի ուսումնասիրման համար զեկուցողները պետք է գան նաև Հայաստան` իրավիճակը տեղում ուսումնասիրելու, և, բացի պատվիրակության անդամներից, հանդիպելու են նաև հասարակական սեկտորի հետ: