Իրանը ՄԱԿ-ի Անվտանգության խորհրդի բանաձևերը խախտելու «գրավոր թույլտվություն» է ստացել՝ կիրակի օրը հայտարարել է Իսրայելի վարչապետ Բենիամին Նեթանյահուն՝ մեկնաբանելով Իրանի միջուկային ծրագրի վերաբերյալ Ժնևում ձեռք բերված համաձայնությունը:
«Որքան շատ մանրամասներ են հայտնի դառնում Ժնևում կնքված գործարքի վերաբերյալ, այնքան ավելի ակնհայտ է դառնում, որ սա վատ գործարք է, վտանգավոր՝ աշխարհի, տարածաշրջանի և Իսրայելի համար»,- ասել է Նեթանյահուն, որի խոսքերը բերում է ITAR-TASS-ը:
Շաբաթ լույս կիրակի գիշերը Ժնևում Իրանն ու «վեցյակը» (ՄԱԿ-ի Անվտանգության խորհրդի 5 անդամ և Գերմանիա) համաձայնության են հասել ու հաստատել Թեհրանի միջուկային ծրագրի շուրջ լարվածությունը վերացնելուն ուղղված գործողություննների ծրագիրը:
6 ամսով ստորագրված փաստաթուղթն ուղղված է միջուկային խնդրի համապարփակ լուծմանը և նախատեսում է Իրանի միջուկային ծրագրի դադարեցում՝ պատժամիջոցների նշանակալի մեղմացման դիմաց:
«Իրանը միլիարդավոր դոլարներ է ստանում պատժամիջոցների մեղմացման արդյունքում և դրա համար ոչնչով չի վճարում»,- ասել է Նեթանյահուն:
Կիրակի օրն ավելի վաղ Նեթանյահուն ասել է, որ Իսրայելն «Իրանին թույլ չի տա զարգացնել ռազմական միջուկային հնարավորությունները»:
Կիրակի Իսրայելի նախագահ Շիմոն Պերեսն ասել է. «Գործարքի հաջողության կամ տապալման մասին պետք է դատել ոչ թե խոսքերով, այլ գործերով: Ես ուզում եմ Իրանի ժողովրդին ասել՝ դուք մեզ թշնամի չեք, իսկ մենք ձեր թշնամին չենք»:
«Իսրայելը, ինչպեսև մնացած միջազգաին հանրությունը, նախընտրում է Իրանի միջուկային խնդրի դիվանագիտական լուծում, իսկ եթե դիվանագիտական ջանքերն ապարդյուն են, ռազմական միջուկային ծրագիրն այլ միջոցով կդադարեցվի: Այլընտրանքային ուղին շատ ավելի վատ է»,- ասել է Պերեսը՝ Իրանին կոչ անելով դադարեցնել ծրագիրը:
ԱՄՆ պետքարտուղար Ջոն Քերին Թեհրանի հետ համաձայնության վերաբերյալ ասել է, որ այն, ընդհակառակը՝ ապահովել է Իսրայելի անվտանգությունը, քանի որ այժմ առկա է մեխանիզմ, որի միջոցով կարելի է երկարացնել այն ժամկետը, որի ընթացքում իրանցիները կկարողանային միջուկային զենքի ստեղծման գործում հաջողության հասնել: «Մենք կկարողանանք հետևել նրանց ծրագրին՝ ինչպես երբեք»,- ասել է Քերին:
