Այն բանից հետո, երբ Եգիպտոսի ռազմական ղեկավարությունը պերսոնա նոն գրատա հայտարարեց Կահիրեում Թուրքիայի դեսպան Հուսեյն Ավնի Բոտսալին, Անկարայում Եգիպտոսի դեսպան Աբդուրհարման Սալախալդինին նույնպես հայտարարվեց պերսոնա նոն գրատա: Այս մասին հայտնում է TRT թուրքական հեռուստառադիոալիքի կայքը:
Թուրքիայի վարչապետ Ռեջեփ Թայիփ Էրդողանը Տրապիզոնում գնահատական է տվել այս իրադրությանը: Նա նշել է, որ Եգիպտոսի դեսպանի հետ նրանք վարվել են այնպես, ինչպես եգիպտացիները՝ Թուրքիայի դեսպանի հետ:
«Մենք այդպիսի դիրքորոշում ենք որդեգրել այն ղեկավարության նկատմամբ, որն իշխանության է եկել հեղաշրջման ճանապարհով: Մենք չենք հարգի նրանց, ովքեր չեն հարգում աշխարհում ժողովրդավարության համար տարվող պայքարը, ժողովրդի ինքնիշխան իրավունքը: Մենք հարգում ենք նրանց, ովքեր հարգանքով են վերաբերվում ժողովրդի կամքին: Մենք ձգտում ենք ժողովրդավարության ամրապնդմանը, և մեր կողմից այդ ուղղությամբ քայլեր ենք կատարում»,- ասել է Էրդողանը:
Նա հայտարարել է, որ Անկարայում Եգիպտոսի դեսպանը մինչև նոյեմբերի 29-ը կլքի Թուրքիան:
