Խաղաղապահ առաքելություններն իրականացնելու համար հարկավոր է ավելացնել ՄԱԿ-ի «երկնագույն բերետավոր» կանանց շարքերը: Այս մասին խոսվել է Նյու Յորքում կայացած մամլո ասուլիսում, որտեղ հավաքվել էին խաղաղության աջակցման ՄԱԿ-ի բոլոր առաքելությունների ղեկավարները: Խաղաղապահ գործողությունների դեպարտամենտի խորհրդական Շտեֆան Ֆելլերը կարծում է, որ կանայք կայունության, անվտանգության և օրենքի գերիշխանության վերականգնման գործում կարող են կարևոր դեր ունենալ:
Օրինակ, բռնության (այդ թվում նաև սեռական) ենթարկված կինն ավելի շուտ կին-ոստիկանի կդիմի, քան տղամարդ-ոստիկանի: Շտեֆան Ֆելլերն ասում է, որ ՄԱԿ-ին արդեն հաջողվել է որոշակի հաջողությունների հասնել:
«Օրինակ, Կիպրոսում Ոստիկանական առաքելության 22 %-ը կանայք են կազմում: Հարավային Սուդանում այդ թիվը 19 % է, իսկ Լիբերիայում՝ 13%»,- նրա խոսքերն է մեջբերում ՄԱԿ-ի ռադիոն:
Դարֆուրում ՄԱԿ-ի և Աֆրիկյան միության առաքելության ոստիկան-կանայք տարբեր ոլորտներում են գործում՝ ապահովում են պաշտպանությունը, սովորեցնում են տեղի ոստիկաններին, բանակցում են կառավարության բարձրաստիճան պաշտոնյաների հետ: Գերազանց արդյունքներ ունի նաև Բանգլադեշի ոստիկանական ջոկատը, որն ամբողջովին կանանցից է բաղկացած:
ՄԱԿ-ի ներկայացուցիչները նշում են, որ «Գլոբալ ջանքեր» նախաձեռնության շրջանակներում ենթադրվում է խաղաղապահ առաքելություններում կանանց թիվն ավելացնել 20 %-ով: