Ես չեմ կարողանում հիշել, թե ով մեկ տարի առաջ քաղաքական դաշտ նետեց գաղափարը, որ եկեք պայքարենք, որ Հանրապետականը չունենա վարչապետի իր թեկնածուն, առավել ևս, որ այդ թեկնածուն Սերժ Սարգսյանն է: Այդ մասին «Առաջին լրատվական»-ի հետ զրույցում նշեց ԱԺ նախկին պատգամավոր Ռուբեն Հակոբյանը:
«Չգիտեմ՝ իշխանության մատը խառն էր դրանում, թե ոչ, բայց որ դա առաջին հերթին բխում էր իշխանության շահերից, չեմ կասկածում: Առաջիկա զարգացումները ցույց կտան, որ այդպես է: Դա քաղաքական օրակարգ չէ, տեխնիկական օրակարգ է»,- ասաց նա:
Ռուբեն Հակոբյանը նկատեց, որ եթե զուտ քաղաքագիտական պրիզմայով նայենք, ստացվում է, որ խորհրդարանական ամենաարմատական ուժը, որ այսօր դրոշակակիրն է վարչապետի թեկնածության դեմ պայքարում, ժամանակին ճանաչեց ԱԺ լեգիտիմությունը․ «Դա նշանակում է, որ ՀՀԿ-ն որպես քաղաքական մեծամասնություն, օրինական է, առավել ևս, որ հիմա այդ մեծամասնության հետ օրենսդրական գործունեություն են իրականացնում»:
Նրա խոսքերով՝ աշխարհում չկա որևէ պետություն, որի պետական կառավարման համակարգը խորհրդարանական լինի ու քաղաքական մեծամասնությունը իր իրավունքները զիջի արմատական ընդդիմությանը, առավել ևս, որ արմատական ընդդիմությունն ասում է՝ հենց եկա իշխանության, ձեզնից շատերը ճաղերի հետևում են լինելու։ «Սա նոնսենս է: Դա նույնն է, որ գնաս բռնցքամարտի, ռինգ մտնես առանց ատամների պաշտպանիչի»,- ասաց Ռուբեն Հակոբյանը: Նա համոզմունք հայտնեց, որ այս պայքարն արդյունք չի տալու, ավելին՝ նոր հիասթափությունների է բերելու:
Ամբողջությամբ՝ տեսանյութում։
