Ուրբաթ օրն Ուկրաինայի շրջաններում երկրի եվրաինտեգրմանն աջակցելու համար ակցիաներ կանցկացվեն, հաղորդում է «Ուկրաինական երրորդ հանրապետություն» հասարակական շարժումը:
Մասնավորապես, ակցիաներ տեղի կունենան Չերնովցի, Սումի, Դոնեցկ, Խարկով, Լվով քաղաքներում: Երեկոյան զանգվածային ակցիաներ են սպասվում նաև Կիևում:
Նախօրեին Ուկրաինայի կառավարությունը դադարեցրել է ԵՄ-ի հետ ասոցացման համաձայնագրի ստորագրման պատրաստությունները: Նախարարների կաբինետը դա մասամբ բացատրել է Ռուսաստանի և ԱՊՀ երկրների հետ տնտեսական հարաբերությունների զարգացման անհրաժեշտությամբ:
Փաստաթղթի ստորագրումը հաջորդ շաբաթ էր ծրագրվում: Ուկրաինայի ընդդիմությունն այդ որոշման վերաբերյալ իր վրդովմունքն է հայտնել՝ կառավարությանը լուծարմամբ, իսկ նախագահին իմփիչմենթով սպառնալով:
Ուկրաինայի իշխանությունների այսպիսի որոշումից հետո Կիևում բողոքի ակցիաներ են անցկացվում:
Երկրի վարչապետը ուրբաթ օրն ընդդիմության պահանջով եղել է խորհրդարանում և բացատրել կառավարության այդ որոշման պատճառները:
