Օրերս ԱԺ-կառավարություն հարց ու պատասխանի ժամանակ «Ելք» խմբակցության պատգամավոր Էդմոն Մարուքյանը կառավարության ղեկավար Կարեն Կարապետյանից հետաքրքրվեց՝ ինչպե՞ս է վարչապետը կոչ անում, որ ներդրողները գան Հայաստան, երբ բիզնեսի շահերը պաշտպանող կազմակերպությունները պարբերաբար ահազանգում են, որ Հայաստանում փոքր և միջին բիզնեսը շնչահեղձ է լինում կամ հարյուրավոր ՓՄՁ-ներ փակվում են: Ի պատասխան Մարուքյանի այս հարցադրման վարչապետը պատասխանեց, թե «ասում եք, թե շնչահեղձ է լինում, սակայն վիճակագրությունը ցույց է տալիս, որ աճում են»։
ՓՄՁ-ների քանակի, դրանց խնդիրների ու այդ ոլորտում տիրող իրավիճակի մասին «Առաջին լրատվական»-ը զրուցեց ՓՄՁ համագործակցության ասոցիացիայի ղեկավար Հակոբ Ավագյանի հետ։
«ԱՎԾ-ն ՓՄՁ ոլորտի առանձին վերլուծություն չի անում և մենք պետք է առաջնորդվենք ՊԵԿ-ի տված հաշվետվությունների համաձայն։ Ես համաձայն եմ այն մտքի հետ, որ ՓՄՁ-ների քանակը աճել է և մեր ունեցած տվյալներն էլ են ցույց տալիս, որ աճել է դրանց թիվը, սակայն արդյո՞ք «որակական» աճ ունենք՝ ցավում եմ, բայց ոչ, քանի որ այդ աճի մեծ մասը կազմել են հենց այն ՓՄՁ-ները, որոնք գործունեություն են ծավալում առևտրային ոլորտում, այսինքն մեր մոտ արտադրող ՓՄՁ-ներ, արտահանող ՓՄՁ-ներ չունենք։
Ինչ վերաբերում է բիզնեսի շնչահեղձ լինելու՝ այդպիսի հատկորոշումներ չեմ տա, բայց ներդրումների մասով եթե նայենք, օտարերկրացու կամ թեկուզ տեղացի գործարարի տեսանկյունից որ նայենք, ապա առաջին հերթին նրանց հետաքրքրում է իր ներդրումների պաշտպանվածության հարցը, որը, բնականաբար, բխում է նաև դատական համակարգից, բիզնես շահերի պաշտպանությունից և մի շարք այլ բաղադրիչներից․ մեզ մոտ դատական համակարգի վերաբերյալ պարզապես լռում եմ, որովհետև մենք ամեն օր տեսնում ենք, թե ինչպիսի վստահություն կա դատարանների նկատմամբ։ Ինչ վերաբերում է բիզնես շահերի պաշտպանությանը, ապա այդտեղ հստակ արդյունավետ մեխանիզմներ պետք է ներդրվեն և այս պարագայում մենք արդեն տարիներ շարունակ պնդում ենք, որ դա անձերից չպետքէ կախված լինի և նաև վարչապետն է դա ասում, բայց հակառակ դրան տեսնում ենք, որ անձերից է կախված, այսինքն մենք այդ մեխանիզմը դեռ չունենք, որ վարչապետին վերաբերենք ոչ թե որպես անձ, այլ ինստիտուտ, ինչը իր հերթին կարող էր բերել քաղաքական շահարկումների պակասի, որովհետև ի վերջո կտեսնեինք, որ բիզնես ոլորտում գործում են կոնկրետ մեխանիզմներ և կապ չունի, թե այդ պահին Պողոսը, Պետրոսը , թե Մարտիրոսն է վարչապետի պաշտոնում»,- շեշտեց Հակոբ Ավագյանն ու այս համատեքստում վերջինս առանձնացրեց նաև անհավասար մրցակցային պայմանների լրջագույն խնդիրը բիզնեսի համար։
Մանրամասները՝ տեսանյութում։
