«Հայաստանի էլեկտրական ցանցեր» ընկերությունում զանգվածային կրճատումները շարունակում են անհանգստացնել աշխատանքը կորցրած հայ էներգետիկներին: Այսօր ՀԷՑ-ի խոշոր սպառողների դեպարտամենտի աշխատակիցները, այլ աշխատողների հետ, ՀԷՑ վարչական շենքի մոտ պահանջեցին ՀԷՑ տնօրեն Եվգենի Բիբինի հրաժարականը՝ պնդելով, թե թույլ չեն տա, որ Հայաստանում ռուսական ընկերությունը ոտնահարի իրենց իրավունքները: Նրանց հետ, սակայն, փորձեց բանակցել ՀԷՑ անվտանգության և վերահսկողության բաժնի տնօրեն Վիկտոր Զալատուխինը, որն ի վերջո չկարողացավ սպառիչ պատասխան տալ աշխատանքը կորցրած էներգետիկներին, ովքեր հաստատակամ են շարունակելու պայքարը իրենց իրավունքները պաշտպանելու համար:
Հիշեցնենք, որ բողոքի ալիքը սկսվեց այն ժամանակ, երբ ընկերության տնօրեն Եվգենի Բիբինը տեղեկացրեց, որ ընկերության մի շարք աշխատակիցներ ազատվելու են աշխատանքից: Սակայն սրանից անմիջապես հետո
մեկնեց Մոսկվա: Էներգետիկների փոխանցմամբ՝ եթե Եվգենի Բիբինի որոշումը կյանքի կոչվի, միայն խոշոր սպառողների դեպարտամենտից աշխատանքից կազատվի 41 մարդ: Նշենք նաև, որ ընկերության աշխատակիցները նամակով դիմել են Սերժ Սարգսյանին ու Ազգային ժողով:
