Քաղաքական մեկնաբան Հակոբ Բադալյանի կարծիքով՝ այն ինչ այսօր տեսանելի է, շատ քիչ հույս է ներշնչում, որ կա արդյունավետ փողոցային քաղաքական գործընթացի ռեսուրս։
ՀԱԿ փոխնախագահ Լևոն Զուրաբյանն օրերս ասել է, որ իրենք այս փուլում չեն միանա Սերժ Սարգսյանի վարչապետության դեմ պայքարին։ Այս հայտարարությանն ի պատասխան, Հակոբ Բադալյանը նշեց. «Պայքարելը դարձել է մոգական, կախարդական բառ։ Ով փորձում է մեծ կարևորություն տալ իր արածին, անմիջապես դնում է այդ բառը, որ մենք պայքարում ենք, մյուսները՝ ոչ։ Ընդ որում, այդ բառը շատերն օգտագործում են, ինչ-որ իմաստով, նաև մունաթ գալով մնացածների հասցեին՝ այ, դուք չեք պայքարում։ Պայքարի առաջնային բնույթը պետք է լինի որևէ մեկի վրա մունաթ չգալը և որևէ մեկը, եթե դուրս է գալիս պայքարի, ապա դա պետք է անի միայն ռեսուրսը հաշվարկելով։ Պայքարի տարբերակ չէ ասել՝ եթե 50 հազար մարդ հավաքվեց փողոցում՝ սա կանենք կամ նա։ Հիմա ասում են՝ փողոցում հավաքված մարդկանց քանակը կթելադրի օրակարգը։ Սա, ես կարծում եմ, քաղաքականության տեսանկյունից, եթե ոչ անմեղսունակություն, այլ ծաղր է հասարակության նկատմամբ»,- «Առաջին լրատվական»-ի հետ զրույցում ասաց Բադալյանը։
Ինչ վերաբերում է Սերժ Սարգսյանի վարչապետության ծրագիրը խափանելու օրակարգով «Քաղպայմանագրի» և «Հանուն Հայաստան պետության» ճակատի միավորման հնարավորությանը, Հակոբ Բադալյանը նշեց. «Հնարավոր է, որ այսօր քաղաքական ուժերն իրար ինչ ասես ասեն և վաղը որևէ շատ փոքր խնդրի համար համատեղ աշխատեն։ Մենք ունենք դրա օրինակները, հասարակությունը տեսել է՝ նույն «Ելք» դաշինքի մաս կազմող «Քաղաքացիական պայմանագիրն» ու «Լուսավոր Հայաստանը» միմյանց ինչ ասես ասում էին Վանաձորում և հետո առանց որևէ բացատրության, թե ինչո՞ւ էին ասում՝ համագործակցեցին խորհրդարանական մանդատ ստանալու հարցում»,- ասաց նա։
Հարցազրույցն ամբողջությամբ՝ տեսանյութում։
