Սաուդյան Արաբիան արագացրել է միջուկային զենքի ստեղծման ծրագրի իրականացումը և պատրաստվում է այն ձեռք բերել Պակիստանից: Այս մասին հայտարարել է ամերիկացի դեմոկրատ սենատոր Էդվարդ Մարկին (Մասաչուսեթս նահանգից): Նա ԱՄՆ նախագահ Բարաք Օբամային նամակ է հղել, որում կոչ է արել դադարեցնել բանակցություններն Էր-Ռիադի հետ՝ միջուկային ոլորտում համագործակցության մասին երկկողմ համաձայնագրի կնքման առնչությամբ: Այս մասին փոխանցում է ITAR-TASS-ը:
Սենատորը հիշեցրել է, որ նման համաձայնագիրը նախատեսում է Սաուդյան Արաբիային միջուկային տեխնոլոգիաների փոխանցում, ինչը նրա կարծիքով՝ սխալ կլինի՝ հաշվի առնելով միջուկային զենք ստանալու Էր-Ռիադի ձգտումը: Այդ առնչությամբ նա նախագահին խնդրել է ձեռնարկել բոլոր անհրաժեշտ միջոցառումները՝ Մերձավոր Արևելքում սպառազինության մրցավազքը կանխելու համար:
Նրա կարծիքով՝ միջուկային ոլորտում համագործակցության մասին ցանկացած երկկողմ համաձայնագիր պետք է պարունակի կետ, համաձայն որի՝ երկիրը, որի հետ ԱՄՆ-ը ստորագրում է այդ փաստաթուղթը, չի զբաղվի միջուկային զենքի մշակմանն ուղղված գործունեությամբ:
