Այս շաբաթվա միջազգային թոփ թեմաներից մեկը կապված էր Միացյալ Նահանգների նախագահ Դոնալդ Թրամփի վարչակազմում տեղի ունեցած վերադասավորումների հետ: Երեքշաբթի՝ մարտի 13-ին, նախագահ Թրամփը հայտարարեց, որ պաշտոնանկ է արել պետքարտուղար Ռեքս Թիլերսոնին և նրա փոխարեն առաջադրել է Կենտրոնական հետախուզական վարչության տնօրեն Մայք Պոմպեոյի թեկնածությունը: Իսկ ԿՀՎ տնօրենի պաշտոնում նա առաջարկել է նշանակել ԿՀՎ տնօրենի տեղակալ Ջինա Հասպելին: Անշուշտ, արտաքին քաղաքական առումով առավել հատկանշական է պետքարտուղարի փոփոխությունը: Թե որքանո՞վ կփոխվի ամերիկյան արտաքին քաղաքականությունը, եթե Կոնգրեսը հաստատի Պոմպեոյին այդ պաշտոնում, առայժմ դժվար է ասել, բայց Թիլերսոնի պաշտոնանկության հիմնական պատճառը հայտնի է: Նախագահը հայտարարել է, որ պետքարտուղար Թիլերսոնի հրաժարականի պատճառը Իրանի հարցի շուրջ առաջացած տարաձայնություններն են:
Թեմայի հետ կապված հարցերն «Առաջին լրատվական»-ի խնդրանքով մեկնաբանել է ամերիկացի վերլուծաբան, Ամերիկայի արտաքին քաղաքականության խորհուրդ (American Foreign Policy Council) վերլուծական կենտրոնի ավագ գիտաշխատող Սթիվեն Բլանկը՝ խոսելով մասնավորապես այն մասին, թե Պոմպեոյի պաշտոնավարման ընթացքում ի՞նչ փոփոխություններ կլինեն Վաշինգտոնի իրանական քաղաքականության մեջ և դա ինչպե՞ս կազդի հայ-իրանական հարաբերությունների վրա:
«Պոմպեոյի նշանակման դեպքում ակնկալում եմ ավելի կոշտ քաղաքականություն Իրանի նկատմամբ: Չգիտեմ՝ դա կանդրադառնա Հայաստանի վրա, թե ոչ, թեև դա հնարավոր է: Մնում է համբերել և տեսնել, թե արդյոք որևէ լուրջ ջանք կգործադրվի Կովկասի ուղղությամբ, մի բան, որը նախկինում չի եղել: Հայաստանը կարող է տուժել, քանի որ չափազանց սերտ հարաբերություններ ունի թե՛ Իրանի և թե՛ Ռուսաստանի հետ և, իրականում, Մոսկվայի արբանյակն է»,- նշեց Սթիվեն Բլանկը:
