Դաշնակցական պատգամավոր Արծվիկ Մինասյանը, անդրադառնալով ԵՄ-ի հետ ասոցացումից հրաժարվելուց հետո ստեղծված իրավիճակին, նշեց, որ Եվրոպան այսօր խոսում է այն մասին, որ ինքը երեք տարի բանակցել է Հայաստանի հետ, որը վերջին պահին հրաժարվում է ասոցացումից, բայց ո՞ւմ հետ էր նա բանակցում՝ իշխանությունների՞:
Արծվիկ Մինասյանը կարծում է, որ հաշվի առնելով նախընթաց փորձը՝ պետք է վերարժևորենք մեր պատկերացումները, Հայաստանը այն կողմնորոշումը պետք է ունենա, որտեղ հայության և ԼՂՀ-ի անվտանգությունը կերաշխավորվի. «Մենք պետք է ելնենք մեր լինելիության սկզբունքից: Ինձ համար խիստ կասկածելի է, որ ՀՀ-ն կանդամակցի ՄՄ-ին, քանի որ կան բազմաթիվ պայմաններ, որոնք կարող են ձեռնտու չլինել ՀՀ-ին և ԼՂՀ-ին,- ասաց Արծվիկ Մինասյանը:
Հայաստանի ներքին մարտահրավերներից ամենակարևորը Արծվիկ Մինասյանը համարում է արտագաղթը, որը ըստ նրա՝ հետևանք է, իսկ պատճառները սոցիալ-տնտեսական, անվտանգության, արդարադատության թերարժեք համակարգերն են:
Նա նշեց, որ պետք է հանդուրժողականության մթնոլորտ ձևավորվի, բայց մենք ունենք այսօր իրար ատող, իրար ոչնչացնող հասարակական քաղաքական խմբեր. «Մենք նախընթաց դասերն էլ հաշվի չենք առնում, ինչ-որ ամբիցիաներ ենք առաջ քաշում, չենք էլ արձանագրում, որ գուցե մենք էլ ենք սխալ»:
ԱԺ ՀՀԿ-ական պատգամավոր Լեռնիկ Ալեքսանյանն էլ նշեց, որ իշխանության մեջ կան մարդիկ, որ մտահոգ են երկրի ապագայով, և կան ուղղակի մարդիկ, որոնք օրվա քաղաքականություն են վարում: Նրա դիտարկմամբ՝ ՄՄ մտնելու խնդիրը գալիս է հեռվից: Եվրոպան, ըստ բանախոսի, շատ լավն է, Եվրոպայի հետ առևտուրը շատ լավ է, բայց արդյոք մենք Եվրոպայի հետ կարո՞ղ ենք հավասարը հավասարի հետ առևտուր անել:
«Պետք է հասկանանք, որ քաղաքականությունը խտացված տնտեսությունն է: Ես այն կարծիքին եմ, որ ՄՄ մտնելը մեզ չի խանգարում ընդունել եվրոպական արժեքները. մենք գնում ենք այդ ուղղությամբ: Եվրոպան այդքան խիստ չի վերաբերվում մեր՝ ՄՄ մտնելուն, և մենք ինչ-որ տեղ ստիպված ենք, և ոչ միայն ռուսներն են ստիպում, այլ մենք՝ մեր կարգավիճակով ենք ստիպված: Թե ինչ է իրենից ներկայացնում ՄՄ-ն՝ այսօր ոչ ոք չի կարող իմանալ: Սա քննարկման առարկա է, ես էլ միանշանակ չգիտեմ՝ դա փայլո՞ւն բան է, թե՞ ոչ: Առաջին քայլերը ճիշտ էին և հեռանկարային»,- ասաց նա:
Լուսանկարը` PanARMENIAN Photo-ի
