Ճապոնիայի կառավարությունը պատրաստակամություն է հայտնել ֆինանսական աջակցություն և անհրաժեշտ սարքավորումներ տրամադրել Սիրիայում քիմիական զենքի ոչնչացման գործընթացի համար, ինչպես նաև այդ նպատակի համար այնտեղ ուղարկել քիմիական զենքի հարցերով իր ռազմական մասնագետներին: Նրանք կգործեն Քիմիական զենքի արգելման կազմակերպության առաքելության հրամանատարության ներքո՝ Տոկիոյում մամլո ասուլիսի ժամանակ ասել է երկրի պաշտպանության նախարար Իցունորի Օնոդերան: Այս մասին հայտնում է ITAR-TASS-ը:
Նրա խոսքով՝ ֆինանսական ներդրման չափը, ինչպես նաև սարքավորումների կազմը կորոշվեն հետագա խորհրդակցությունների ընթացքում:
Սիրիայում կազմակերպության առաքելությանը միանալու համար նախատեսվում է ուղարկել երեք ճապոնացի մասնագետի: Նրանք արդեն ունեն կազմակերպության շրջանակում աշխատանքի փորձ:
«Ճապոնիան մտադիր է ցուցաբերել ամենաակտիվ աջակցությունը Սիրիայում քիմիական զենքի ոչնչացման գործընթացին»,- այդ առիթով առանձին մամլո ասուլիսում հայտնել է Ճապոնիայի արտգործնախարար Ֆումիո Կիսիդան:
Հիշեցնենք, որ նոյեմբերի 15-ին Քիմիական զենքի արգելման կազմակերպության գործադիր խորհուրդը հաստատել է մինչև 2014-ի հունիսի 30-ը սիրիական քիմիական զինանոցի ոչնչացման ծրագիրը:
