Դերասան Վարդան Պետրոսյանն այսօր տեղափոխվել է «Քանկոր» սիրտանոթային բժշկական կենտրոն. պատճառը նրա առողջական վիճակի վատացումն է:
«Առաջին լրատվական»-ի հետ զրույցում նրա փաստաբան Նիկոլայ Բաղդասարյանը նշեց, որ իր այցելության պահին դերասանը դեռ հետազոտություններ էր անցնում: Հարցին՝ արդյոք նա դարձյալ կտեղափոխվի Դատապարտյալների հիվանդանո՞ց, փաստաբանը նշեց, որ պետք է սպասել արդյունքներին, դրանից հետո միայն պարզ կլինի: Հետազոտության արդյունքները հայտնի կլինեն 1-2 ժամից:
Ի պաշտպանություն դերասանի ներկայացվող երաշխավորագրերն ու ստորագրահավաքը, ըստ Բաղդասարյանի, կարող են ձեռք բերել իրավական ուժ: Անձինք կարող են տալ երաշխավորագրեր, որոնց շնորհիվ դերասանի նկատմամբ խափանման միջոցը կարող է փոխվել: Կազմակերպված ստորագրահավաքի շրջանակներում արդեն հավաքվել է շուրջ 11 հազար ստորագրություն:
Հիշեցնենք, որ հոկտեմբերի 20-ին Եղվարդ-Երևան ճանապարհի 2-րդ կմ-ին դերասան Վարդան Պետրոսյանի վարած «ԲՄՎ-320» և «ՎԱԶ-2121» մակնիշի մեքենաների բախման հետևանքով մահվան ելքով վթար էր տեղի ունեցել:
Նշենք, որ վթարի հետևանքով դերասան Վարդան Պետրոսյանը տեղափոխվել էր «Էրեբունի» բժշկական կենտրոն: Բացի Պետրոսյանից, վթարի հետևանքով ծանր վնասվածքներով հիվանդանոցներ էր տեղափոխվել ևս 6 մարդ. «Վազ 2121» մակնիշի մեքենայի ուղևորներից հորեղբոր որդիներ Էդգար և Էդուարդ Հակոբյանները մահացել էին:
Դեպքի առթիվ հարուցվել էր քրեական գործ՝ ՀՀ Քրեական օրենսգրքի 242-րդ հոդվածի 3-րդ մասի հատկանիշներով՝ «Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթևեկության կամ տրանսպորտային միջոցների շահագործման կանոնները խախտելը որն անզգուշությամբ առաջացրել է երկու կամ ավելի մարդու մահ»:
Նախաքննական մարմինը որոշում էր ընդունել ձերբակալել Վարդան Պետրոսյանին:
