Խոշոր ու միջին հարկ վճարողների մոտ ռիսկային է հարկատուների շուրջ 50, իսկ փոքրերի դեպքում` 75 տոկոսը: Հարկային մարմնի գնահատականով, սակայն, խոշորի դեպքում ստվերի տեսակարար կշիռն ավելի փոքր է` համեմատ փոքրերի: «Խոշորում ռիսկային համարվող կազմակերպությունների ընդհանրացված ստվերը կազմում է 15-20 տոկոս, իսկ փոքրում այդ ցուցանիշն անհամեմատ բարձր է` 50-100 տոկոս այս մասին լրագրողների հետ հանդիպմանն ասաց Պետեկամուտների կոմիտեի նախագահի առաջին տեղակալ Կարեն Բրուտյանը:
Նրա խոսքով` յուրաքանչյուր հարկ վճարողի մոտ ստվերը տարբեր դրսևորումներ ունի: Չարամտորեն հարկերից խուսափողները հիմնականում շահութահարկ, եկամտահարկ ու շրջանառության հարկ են թաքցնում: Կամ էլ դա արտահայտվում է աշխատողների թվաքանակը կամ վճարվող աշխատավարձերի չափը թերհայտարարագրելու, ինչպես նաև տնտեսական գործունեությանը չառնչվող ծախսերն ուռճացնելու կամ կեղծ ծախսեր հայտարարագրելու միջոցով: Ռիսկային հարկ վճարողների մի խումբն էլ, ըստ պաշտոնյայի, օգտվում է օրենսդրական բացերից և խուսափում հարկային պարտավորություններից:
«Համատարած են հարկ վճարողները, որոնց մոտ այս կամ այն չափով առկա է հարկային ստվեր: Բոլորի հետ անհատական աշխատանք է իրականացվում, հատկապես 115 միլիոն դրամը գերազանցող հարկ վճարողների դեպքում, որոնց թիվը շուրջ 4500 է: Նրանց հետ ունենք երկխոսության ձևաչափ: Անցած տարի սկսել ենք մի գործընթաց, որն անվանել ենք «ստվերի անձնագրավորում»: Ամեն հարկ վճարողի պարագայում ի հայտ են բերվում ռիսկեր, դրանք տալիս ենք նրանց ու ասում պարզաբանեք, որ այդ ռիսկերն առկա չեն կամ ուղղեք դրանք: Եթե չեն ուղղում, հսկողական աշխատանքների միջոցով ստիպում ենք, որ ուղղեն»,-հավելեց ՊԵԿ փոխնախագահը:
Կարեն Բրուտյանի դիտարկմամբ` եթե խոշորի դեպքում իրենց վարչարարությունն ուղղված է ֆիսկալ մուտքերի ապահովմանը, ապա փոքրերի դեպքում` հավասար մրցակցային պայմաններ ստեղծելուն: «Եթե մեկ փողոցի վրա երեք փոքր խանութ կա, և դրանցից մեկը հարկեր չի վճարում, դա էապես ազդում է այն երկուսի գործունեության վրա, չի թողնում, որ նրանք առողջանան, վաղը մյուսը օրը դառնան միջին ու խոշոր:
Մեր հիմնական գործունեությունն այստեղ այդ վիրուսները դուրս հանելն ու հավասար մրցակցային միջավայր ապահովելն է»,-ընդգծեց պաշտոնյան: Նրա տեղեկացմամբ` ներկայում Հայաստանում հաշվառվում է շուրջ 65 հազար փոքր ձեռնարկություն, միջինները 3.5 հազար են, խոշորները` 1000:
