ԱԺ-ն այսօր՝ մարտի 2-ին, շարունակում է իր աշխատանքները և քննարկում է Սահմանադրական դատարանի անդամի համար Հրայր Թովմասյանի թեկնածության հարցը:
«Ըստ տարածված լուրերի՝ Հրայր Թովմասյանը մեկ կամ մի քանի ամսից կփոխարինի Գագիկ Հարությունյանին ՍԴ նախագահի պաշտոնում»,- հայտարարեց «Ելք» խմբակցության ղեկավար Նիկոլ Փաշինյանը:
Նրա խոսքով՝ ինքը անդրադառնալու է ոչ թե Հրայր Թովմասյանի անձին, այլ նրա կարիերային. «Պարոն Թովմասյանը եղել է ընդդիմադիր «Ժառանգության» վարչության անդամ: «Մարտի 1-ի դեպքերի լավագույն լուծումը հարուցված գործերի կարճումն էր». «Ա1+»-ին տված այս հարցազրույցից հետո՝ ով հրաշք, նա 5 ամսից նշանակվում է արդարադատության նախարար: Դրանից հետո ձեր խոնարհ ծառան, ձեր չէ՝ ժողովրդի, հայտնվում է բանտում»:
Փաշինյանը նշեց՝ եթե Հրայր Թովմասյանը ամեն ինչ չանի ՀՀԿ-ի կանոններին համապատասխան, նրան կասեն՝ «չհասկացանք, կարող ա՞ գիտես եկել ես ստեղ, որ էլի շարունակես քո ընդդիմադիր զամաշկաները: Կհանեն դուրս, և մարդու մոտ տարած-հետ բերածի կարգավիճակում չհայտնվելու բնական վախ է առաջանում: Նա ամեն օր պետք է ապացուցի Սերժ Սարգսյանին ու նրա վարչակազմին իր հավատարմությունը»:
Պատգամավորի խոսքով՝ ՀՀ-ում առաջընթացի մի հիմնական պայման գոյություն ունի՝ Սերժ Սարգսյանի թրի տակով անցե՞լ ես, թե՞ ոչ. «Եթե Սերժ Սարգսյանի թրի տակով չես անցել, Հրայր Թովմասյան՝ չէ, դաժե Կոստանյան լինես, շանս չունես: Եթե նա հոտառությունը կորցնի, թե ինչ է պետք Բաղրամյան 26-ին, 3 րոպե հետո նստած կլինի «Արթիկ» ՔԿՀ-ում»:
Մանրամասները՝ տեսանյութում:
