Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Արմեն Խաչատրյանի նախագահությամբ սկսվում է 21-22 տարեկան 4 երիտասարդների գործի դատավարությունը:
Ըստ մեղադրանքի՝ երևանցի Սարգիս Կարապետյանը, հրազդանցի Տիգրան Չալումյանը, Կոտայքի մարզի Զովունի գյուղի բնակիչ Արթուր Ֆիդանյանը և թալինցի Սաֆար Խամոյանը ի մի էին եկել մայրաքաղաքի «Հաղթանակ» զբոսայգում, այնտեղ տեղադրված հեռադիտակով «հետազոտել» շուրջբոլորը, ապա գաղտնի հափշտակել էին հեռադիտակի գանձարկղում եղած 25 հազար դրամը:
«Հեռադիտած» երիտասարդներին մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 1-ին կետով:
Ընդհանուր իրավասության նույն դատարանում Արմեն Բեկթաշյանի նախագահությամբ քննվում է ժամկետային զինծառայող, 19-ամյա էջմիածինցի Արման Մկրտչյանի գործը, ով հմտորեն կարողացել էր զինծառայությունը զուգադրել «Հաղթանակ» զբոսայգում զբոսնելու հետ:
Եվ «Հաղթանակում» պարտվողի դերում չհայտնվելու համար նա, ըստ մեղադրանքի, զբոսանքի ժամանակ ապօրինի կրել էր կռփազենքի նմանողությամբ արհեստագործական եղանակով պատրաստված, հարվածող-փշրող մետաղե սառը զենք, որը անձնական խուզարկությամբ նրա մոտից հայտնաբերել էին ոստիկանության աշխատակիցները:
Արման Մկրտչյանին մեղադրանք է առաջադրվել ապօրինի սառը զենք կրելու համար՝ ՀՀ քրեական օրենսգրքի 235 հոդվածի 4-րդ մասով:
