Սեպտեմբերի 3-ից հետո ՀՀ-ում ներդրումների պատրաստ եվրոպացիները վերաձևավորում են իրենց ռազմավարությունը՝ «Առաջին լրատվական»-ի հետ զրույցում ասաց Բելգիա-Հայաստան Առևտրաարդյունաբերական պալատի նախագահ Վալերի Սաֆարյանը՝ պատասխանելով հարցին, թե սեպտեմբերի 3-ի ՀՀ որոշումից հետո ինչ տրամադրություններ կան եվրոպացի գործարարների շրջանում, որոնք նախկինում պատրաստ էին ՀՀ-ում ներդրումներ կատարել:
Վալերի Սաֆարյանը նշեց, որ Եվրոպայի մանր և միջին ձեռնարկությունները անհրաժեշտ կերպով տեղեկացված չեն ՄՄ և ԽՀԱԱԳ բանակցություններին և ողջ իրականությանը: Թեև, ըստ նրա, ձեռնարկատերերը հասկանում են թեման ընդհանուր կերպով, երբ սեպտեմբերի 3-ին որոշում կայացվեց ՄՄ-ին միանալու մասին, այդ թվում՝ հասկանում են, որ պետք է վերաձևավորել իրենց մարքեթինգային ռազմավարությունը, քանի որ ՄՄ-ն այլ շուկա է, ՄՄ-ն ևս պետք է ձևավորի այն ուղին, թե ինչպես պետք է գործակցի Եվրոպայի հետ:
«Այսպիսով, ես կարծում եմ, որ բոլորը սպասողական վիճակում են, սպասում են, բայց չեն հետաձգում ցանկացած տիպի բիզնես-գործակցությունը: Ես կարծում եմ, որ կան շատ դրական սպասումներ»,- ասաց նա:
Վերջինիս համոզմամբ, եթե նույնիսկ ՀՀ-ն միանա ՄՄ-ին, շատ մանրուքներ պետք է հստակեցվեն, քանի որ Հայաստանը ԱՀԿ անդամ է, առևտրային կապեր ունի այլ երկրների հետ, համագործակցության ուղղությամբ շատ այլ սպասումներ կան, աշխատանքներ պետք է տարվեն:
«Մենք սպասում ենք, և ես հուսով եմ, որ առաջիկա ամիսներին մենք հստակեցում կունենանք: Միևնույն ժամանակ, ես հավատում եմ, որ Հայաստանը, ինչպես միշտ է ունեցել շատ բալանսավորված քաղաքականություն տարածաշրջանում տարբեր շահերի նկատմամբ, այժմ էլ վստահ եմ, որ Հայաստանը և Եվրոպան կգտնեն գործակցության նոր ուղի, հնարավոր է՝ դա չլինի Վիլնյուսյան գագաթնաժողովի ընթացքում, բայց կարծում եմ, որ դա կլինի գալիք հանդիպումների ընթացքում: Եվրոպան փոքր և միջին ձեռնարկությունների մայրցամաք է, իհարկե մեծ ձեռնարկությունները կցանկանան որոշակիորեն վերլուծել իրավիճակը, նրանք ընդհանուր ենթատեքստին և իրողությանը տեղյակ չեն: Հայաստանի և Առևտրաարդյունաբերական պալատի դերակատարության շնորհիվ, ՀՀ ներկայացուցիչների շնորհիվ պետք է բացատրել գործակցության նոր ուղին: Մենք պետք է առաջ ընթանանք և աշխատենք»,- այսպես ավարտեց իր խոսքը Վալերի Սաֆարյանը::
