ՀՀԿ մամուլի խոսնակ, ԱԺ փոխնախագահ Էդուարդ Շարմազանովը «Առաջին լրատվական»-ի հետ զրույցում ասաց, որ կուտակային կենսաթոշակի անցման առթիվ ԱԺ չորս խմբակցությունների նախաձեռնած արտահերթ նիստը բոյկոտելը «քաղաքական պայքարի» տեսակ է, որը կիրառում է ՀՀԿ-ն: Այլ հարց է, թե ում դեմ է ուղղված ՀՀԿ քաղաքական հուժկու պայքարը: Ներկայացնում ենք Էդուարդ Շարմազանովի հետ մեր զրույցը:
– Պարոն Շարմազանով, իշխանության ներկայացուցիչները, հատկապես Դուք խոսում եք երկխոսության, բազմակարծության մասին, սակայն նույնիսկ արտահերթ նիստով քննարկման հնարավորություն չտվեցիք ԱԺ 4 խմբակցություններին:
– Նախ նշեմ, որ համամիտ չեմ հարցադրման հետ, որովհետև ընդդիմության, 4 ֆրակցիաների, ընդհանրապես քաղաքական ուժերի և քաղաքացիական հասարակության ներկայացուցիչների հետ այս օրենքի առթիվ բազմիցս քննարկումներ եղել են թե նախագահական նստավայրում, թե հասարակական կազմակերպությունների հետ և թե, ամենակարևորը, հենց այս դահլիճում ԱԺ-ի, և օրենքը, երբ որ ընդունվեց, ընդունվեց ամբողջական քննարկումների արդյունքում, և բնականաբար, յուրաքանչյուր խմբակցություն իր կարծիքն արտահայտեց, մենք էլ` մերը: Այդ քննարկումների արդյունքում մենք քննարկեցինք և այլևս բովանդակային քննարկման անհրաժեշտություն չենք տեսնում, որովհետև մենք այդ քննարկումներն իրականացրել ենք և ընդունել ենք օրենքը: Ինչ վերաբերում է նիստի, այսպես ասած, տապալմանը կամ քվորումի բացակայությանը, պետք է նշեմ, որ Սահմանադրության 66-րդ հոդվածը հնարավորություն է տալիս պատգամավորներին, որ նրանք իրենց գործունեությունը ծավալեն իրենց խղճին և համոզմունքներին համապատասխան: ԱԺ կանոնակարգի 99 հոդվածը հարգելի է համարում քվորումի բացակայությունը, եթե խմբակցությունը մինչև նիստը հայտարարում է քվեարկությանը չմասնակցելու մասին: Դուք տեսաք, որ ԱԺ նախագահն ընթերցեց խմբակցության որոշումը քաղաքական բոյկոտի վերաբերյալ և քաղաքական բոյկոտը դա պայքարի մի ձև է: Հիմա կարող է մեկին դուր է գալիս, մեկին դուր չի գալիս:
– Քանի որ այսօր հասարակական բողոք կա, նաև` ստորագրահավաք է «Ֆեյսբուքում» և բազմաթիվ ՀԿ–ներ դիմել են վարչապետին, ստացվում է ՀՀԿ–ն քաղաքական պայքար է մղում հասարակության դեմ:
– Ո՛չ, ես չեմ կարծում, որ պետք է որևէ մեկը խոսի ողջ հասարակության անունից: Այո՛, մենք ընդունում ենք քաղաքական բազմակարծության առկայությունը, և շատ բնական է, որ հասարակության մի մասը ՀԿ-ների կամ քաղաքական կուսակցությունների միջոցով իրենց բողոքի ձայնը բարձրացնում են, բայց մենք չենք ապրում տոտալիտար համակարգում, որտեղ բոլորը ծափահարեն մեկ օրենսդրական նախաձեռնության: Մենք շատ հարգանքով ենք վերաբերվում բոլոր քաղաքական ուժերի և էսօրվա միտինգավորների կարծիքին, բայց մենք ունենք մեր կարծիքը և կարծում ենք, որ այս կարծիքը ամենաճշմարիտն է: Դրա համար մենք քվեարկել ենք յուրաքանչյուրս մեր խղճի համապատասխան:
– Հնարավո՞ր է` Հանրապետականը լուրջ մտավախություն ուներ այս քննարկումից, որ նույնիսկ քննարկման հնարավորություն չտվեց:
– Այնպես չի, որ այս օրենքի քննարկման արդյունքում ընդդիմությունը կամ այլընտրանքը իրենց կարծիքը չեն արտահայտել: Եղել են շատ բուռն քննարկումներ, և այդ քննարկումների արդյունքում մենք քվեարկությամբ որոշել ենք անցկացնել այս օրենքը: Սա մեր համոզմունքն է, և որևէ մեկը չի կարող դատապարտել Հանրապետականին կամ «Օրինաց երկրին»՝ մեր քաղաքական դիրքորոշման համար: Մենք քննարկել ենք և բովանդակային քննարկման անհրաժեշտություն չենք տեսնում:
– Մյուս կողմից՝ ստացվում է, որ մի խումբ ՀՀԿ–ականներ ու կառավարության անդամներ իրենց կարծիքը պարտադրում են հասարակությանը, քանի որ հենց հասարակությունն այսօր համաձայն չէ կուտակային թոշակի համակարգին:
– ՀՀԿ-ն` որպես քաղաքական մեծամասնություն, և ՕԵԿ-ը` որպես կոալիցիոն գործընկեր, խորհրդարանական ընտրություններում ստացել են մեծամասնության քվեն:
– Ստացե՞լ են արդյոք, թե՞ ձեռք են բերել ինչ–ինչ ճանապարհներով:
– Այո՛, ստացել են: Բացեք, նայեք բոլոր դիտորդական առաքելությունների կարծիքները:
– Մենք մասնակցել ենք ընտրություններին, պարոն Շարմազանով:
– Մենք էլ ենք մասնակցել, դիտորդներն էլ են մասնակցել եվրոպացի, բացեք, կարդացեք: Մենք ունենք այդ մանդատը և իրականացնում ենք այն քաղաքականությունը, որը վստահված է մեզ մանդատով հասարակության մեծամասնության կողմից:
– Պարոն Շարմազանով, Դուք տապալեցիք այս արտահերթ նիստը, սակայն դրանով հասարակական բողոքը չի վերանում: Ի՞նչ եք անելու այդ կապակցությամբ:
– Մեր համար այս հարցի քննարկումը իրականցվել է, օրենքի ուժ ունի:
– Ձեզ համար քննարկումն իրականացվել է, սակայն այն ՀԿ–ների, մարդկանց համար, որոնց վրա պիտի կիրառվի, չի իրականցվել: Մարդիկ ասելիք ունեն, խնդիր ունեն դրա հետ:
– Սա քաղաքական բազմակարծության դասական օրինակ է, և շատ բնական է, որ այս կամ այն օրենքի հետ կապված լինի նաև հասարակության մի հատվածի դժգոհությունը: Մենք ժամանակին նիստ արել ենք, հարցը քննարկվել է, և որոշումը կայացվել է, և նոր բան ասելու չունենք: Եվ բնական է, որ այս կամ այն հասարակական կամ քաղաքական կազմակերպությունները ունենան դժգոհություն:
– Իսկ ՀՀԿ–ն այսպիսով մտավախություն չունի՞, որ կկորցնի հասարակական առանց այն էլ թույլ վստահությունը:
– Շնորհակալություն Հանրապետականի փոխարեն մտահոգվելու համար: Չէ՛, չունի:
