«Երկխոսության արդյունքում ՀԱԿ-ի ընտրազանգվածը չի նվազել, այլ կրճատվել է, բայց նա ստացել է ուրիշ ձայներ»,- լրագրողների հետ հանդիպման ժամանակ հայտարարեց «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը:
Նա նշեց, որ և՛ իշխանական, և՛ ընդդիմադիր դաշտում կան հատվածներ, որոնք ոչ ընդդիմությանն են ընդունում, ոչ էլ իշխանությանը. «Դա մոտ 15 տոկոս ձայն է, և ընտրազանգվածի տատանվող հատվածն է: Ամբողջ ընտրարշավը գնում է հենց այս 15 տոկոսը վերցնելու համար»:
Ադիբեկյանի գնահատմամբ՝ ՀԱԿ-ը ևս գնում է այդ 15 տոկոսի հետևից: Դրան Ադիբեկյանը գումարեց նաև, իր տվյալներով, ՀԱԿ-ին համակիր 5 տոկոս ընտրազանգվածը. «Եթե կարողանա վստահություն ներշնչել, որ հաղթում է, ապա ևս 15 տոկոս ձայն կստանա, ինչն էլ դառնում է 30-35 տոկոս, որը բավական մեծ թիվ է»:
Սոցիոլոգի խոսքերով՝ այսօր պայքարն ընթանում է ոչ թե ընդդիմադիր և իշխանական դաշտերի միջև, այլ այս երկու դաշտերի ներսում: Ընդդիմադիր դաշտում, ըստ Ադիբեկյանի, միմյանց դեմ պայքարում են ՀԱԿ-ը, «Ժառանգությունն» ու Դաշնակցությունը, իսկ իշխանական դաշտում՝ ՀՀԿ-ն և ԲՀԿ-ն:
Ադիբեկյանի դիտարկմամբ՝ նման պայքարն ավելի լավ է, քանզի այն հույս է ներշնչում, որ ընտրությունների ժամանակ կեղծելը շատ դժվար է լինելու, և առաջիկա ընտրությունները լինելու են ազատ ու թափանցիկ: Նա նաև տեղեկացրեց, որ ԲՀԿ-ն արդեն սկսել է շտաբներ ձևավորել, բայց դա դեռ պաշտոնական տվյալներ չեն: