Հունվարի 14-ին լրանում է 10 տարին, ինչ Հյուսիսային պողոտայի բնակիչներին ծեծուջարդով հանեցին տներից: Այսօր նրանք հավաքվել էին կառավարության մոտ՝ կառավարությունից պահանջելով իրենց գումարները:
«Արդեն տասը տարի է՝ մենք պայքարում ենք այս պետության անօրինական որոշման դեմ, սակայն անօգուտ, մեզ չեն լսում, մեր հարցին լուծում չեն տալիս… ոչ մեկիս տեղում տուն չտվեցին, ծեծելով հանեցին դուրս՝ չնչին գումարներով»,- «Առաջին լրատվական»-ի հետ զրույցում ասաց Տերյան 18-ի նախկին բնակչուհի Ժենյա Պողոսյանը:
Նա հիշեցրեց, որ Երվանդ Զախարյանը այն ժամանակ հեռուստատեսությամբ հայտարարեց, որ ամեն քառակուսի մետրի համար կտան հազար դոլար. «Իր ծանոթներին տվեց, իսկ մեզ՝ 300-400 դոլար: Մենք պահանջում ենք վերադարձնել մեր գումարը, ինչո՞ւ ես պետք է ծայրամասում ապրեմ, ինչո՞ւ իմ տան տեղը Ռիժկովը պետք է գա ապրի: Երեք հարկանի սեփական տուն էր՝ «եվրոռեմոնտով» տուն»,- ասաց Ժենյա Պողոսյանը:
Նա նշեց, որ մոտ մի 20-25 ընտանիք են պահանջում իրենց գումարները: Նրա խոսքով՝ ընտրությունների ժամանակ խաբում են՝ ասելով, թե իրենց թեկնածուին ընտրելու դեպքում հարցը լուծում կստանա: «Գնում ենք, ընտրում ենք, և այդպես վերջանում է: Մենք խաբված ենք մնում»,- ասաց նա:
Լալայանց 29-ի նախկին բնակչուհի Գոհար Ասատրյաննն էլ նշեց, որ իր տունը սեփական էր, իրենց ստիպողաբար հանել են՝ տալով հինգ օր ժամանակ. «Կողքի տունը ծեծուջարդ արեցին, ես վախեցա, դուրս եկա: 25 հազար դոլար տվեցին, որ բերաններս փակենք»:
Նրանք նշեցին, որ թեև նամակներ շատ են գրել, բայց պատասխան չեն ստացել, դիմել են նախագահին, ասել է՝ ուղարկեք քաղաքապետարան, քաղաքապետարանը ԾԻԳ է ուղարկել, և այսպես շարունակ:
Իսկ քաղաքապետը չի հանդիպել բնակիչներին: Նրանցից մեկը նշեց, որ քաղաքապետը զբաղված է փոքր տարածքներ վերցնելով և շենքեր կառուցելով, և նա անգամ իր հոր պատիվը չպահեց:
Վերջին անգամ քաղաքապետարանում բնակիչներին երկու ամիս առաջ ընդունել է իրավաբանը, ասել՝ կզանգենք կկանչենք, երկու ամիս է՝ դեռ կանչում է:
Տերյան 4/18-ի նախկին բնակիչ, պետական կարիքների զոհերի ներկայացուցիչ Գագիկ Սարգսյանն էլ նշեց, որ իրեն հանել են սեփական բնակարանից. «Սերժ Սարգսյանը այն ժամանակ վարչապետ էր, այն ժամանակ ընդունել է կառավարական որոշում, ուղարկել արդարադատության նախարարություն՝ փորձաքննության: Այդ փորձաքննության հիման վրա Ռոբերտ Քոչարյանը ստորագրել է, և մեկ փորձագետի փորձաքննությամբ մեզնից խլել են տունը, և հիմա իմ հողի վրա շենք է կառուցվում»,-ասաց նա՝ հավելելով, որ իրեն տվել են ընդամենը 7080 դոլար:
