Ընդդիմադիր արտախորհրդարանական երեք կուսակցություններ՝ «Հայրենիք և պատիվ», «Քրիստոնեա-ժողովրդավարական վերածնունդ», «Ժողովրդավարական հայրենիք», քաղաքական նոր գործընթաց են սկսում: Նրանց տարածած հայտարարության մեջ մասնավորապես նշվում է. «Մի խումբ արցախյան պատերազմի ազատամարտիկներ, խորապես գիտակցելով պետականությունը և անվտանգություն ստեղծելու հրատապ անհրաժեշտությունը, միավորվելով այն իրականացնելու կարևորության և անխուսափելիության գաղափարի շուրջ, նախաձեռնում են քաղաքական գործընթաց»:
«Առաջին լրատվական»-ի հետ զրույցում «Հայրենիք և պատիվ» կուսակցության նախագահ Գառնիկ Մարգարյանն ասաց, որ իրենց համագործակցությունը ազատամարտիկների հետ ամիսներ առաջ է սկսվել, իսկ սրանով նրանք այն ավելի են խորացնում. «Երբ հուլիս-օգոստոս ամիսներից ազատամարտիկները սկսեցին հանրահավաքներ՝ նպատակն արդեն պարզ էր՝ առ այն, որ ազատամարտիկները գնալու են իշխանափոխության, նախագահի հրաժարականի պահանջով: Մենք արդեն այն ժամանակ, «Հայրենիք և պատիվ» կուսակցությունը և «Հակակոռուպցիոն» խորհուրդը, ի պաշտպանություն ազատամարտիկների հայտարարություն էինք տարածել. դա բավարար չէր:
Երբ արդեն սկսվեց կլոր սեղանը և կուսակցությունների հրավիրեցին կլոր սեղանի շուրջ՝ մենք Կոնգրեսում աշխատած տարիների ընթացքում իրար հետ մտերիմ լինելով և գաղափարական տարաձայնություններ չունենալով որոշեցինք, որ այդ երեք կուսակցություններով մտնում ենք ակտիվ պայքարի մեջ»,- ընդգծեց Մարգարյանը:
Մեր հարցին` ինչո՞ւ հենց այդ երեք կուսակցություններով, այլ կուսակցություններն իրենց միանալու ցանկություն չե՞ն ունեցել, մեր զրուցակիցը պատասխանեց. «Առանձին-առանձին շատ են, ես տեղեկություն ունեմ, որ երկու կուսակցություն են միասին անելու, կա նաև մեկը, այնտեղ շուրջ տասից ավել կուսակցություններ են, բայց մենք երեքով ենք նպատակահարմար գտել»:
Պարոն Մարգարյանին խնդրեցինք մանրամասնել, թե քաղաքական գործընթաց ասելով ի՞նչ նկատի ունեն՝ հանրահավաքների՞ շարք, թե՞ այլ որևէ գործունեություն են ծավալելու. «Ազատամարտիկների հետ համատեղ հանրահավաք անցկացնելու համար «Հայրենիք ու պատիվ» կուսակցության քաղխորհուրդն է ներկայացնում քաղաքապետարան իրազեկում, բայց դա տեխնիկական խնդիր է, կարևորն այն է, որ մեր առաջ դրել ենք՝ իշխանափոխություն, համակարգի փոփոխություն, Սերժ Սարգսյանի հրաժարական»:
Նա նաև հավելեց, որ հիմա հանդիպումներ են ունենում նաև շրջաններում. «Կարծեմ Աշտարակի Օհանավան գյուղում ազատամարտիկները և կուսակցության ներկայացուցիչները հանդիպման են հիմա: Հանդիպումներ են լինելու շրջաններում, գյուղական բնակավայրերում, այնտեղ, որտեղ կան պատերազմի մասնակից ազատամարտիկներ: Այն կուսակցությունները, որոնք մասնակցում են կլոր սեղանին ակտիվ մոբիլիզացիա են ստեղծելու, ժողովուրդը պետք է բարձրանա և պետք է լուծի իշխանափոխության և նոր արդար ընտրությունների հարցը»:
Հետաքրքրվեցինք նաև` կիսո՞ւմ է վերջին հանրահավաքի ընթացքում ազատամարտիկների հնչեցրած այն տեսակետը, թե պետք է շարունակել Շանթ Հարությունյանի հեղափոխությունը. «Ես չեմ փորձում մեկնաբանել, բայց դա ժողովրդին ցույց տվեց, որ եթե գնում ես հանդգնության, ապա իշխանությունը ի զորու չէ դա փակելու կամ կանգնեցնելու: Կան տարբեր՝ օբյեկտիվ, սուբյեկտիվ խնդիրներ, որոնց մասին ես չէի ցանկանա խոսել: Այդ միջադեպը ցույց տվեց, որ ոստիկանություն կոչվածն էլ պատրաստ չէ օրենքի շրջանակներում գործողությունների, դիմում է բիրտ ուժի: Նախ` թույլ տվեցին, որ դա տեղի ունենա, հետո դիմում եմ բիրտ ուժի և ամեն ինչ բարդում քաղաքացիների վրա:
Դա այդպես չէ, աշխարհի զարգացած երկրներում այդպես չէ: Իշխանությունները բարբաջում են Եվրոպա, Արևմուտք, բայց մոռանում են, որ Եվրամիության կանոնադրությունում և զարգացած երկրների օրենքներում, սահմանադրությունում ու կանոնադրություններում ամրագրված է, որ ժողովրդի նկատմամբ առանձին դեպքերի ժամանակ ոչ ադեկվատ ուժ կիրառել չի կարելի, այս դեպքը այլ պատկեր ցույց տվեց»,- եզրափակեց նա:
