Google-ի տնօրենների խորհրդի նախագահ Էրիկ Շմիդտը ընդգրկվել է The Economist Group մեդիաընկերության ղեկավարության կազմում: Մեդիաընկերությունը զբաղվում է The Economist պարբերականի հրատարակմամբ: Այս մասին հայտնում է The Financial Times-ը:
Հաղորդվում է, որ պայմանագիրը երեք տարի ժամկետով է: Մանրամասներ այն մասին, թե կոնկրետ ինչ դեր նա կունենա մեդիաընկերության տնօրենների խորհրդում, չի հաղորդվում:
Վերջին շրջանում համացանցային ընկերությունների ներկայացուցիչները ակտիվ հետաքրքրություն են դրսևորում ԶԼՄ-ների գործունեության նկատմամբ: Այս տարի հայտնի է դարձել Amazon-ի հիմնադիր Ջեֆ Բեզոսի կողմից The Washington Post-ի ձեռքբերման մասին, իսկ eBay-ի հիմնադիր Պիեռ Օմիդյարը պատմել է մոտ ժամանակներս սեփական լրատվամիջոցի ստեղծման ծրագրերի մասին: Նոր պարբերականում Օմիդյարը ծրագրում է մոտ 250 մլն դոլար ներդնել:
The Economist-ը հրատարակվում է 1843 թվականից, լուսաբանում է քաղաքական իրադարձություններ, միջազգային հարաբերություններ, ինչպես նաև համաշխարհային տնտեսական և գործարար նորություններ:
