Մալթայի խորհրդարանը հավանություն է տվել երկրի քաղաքացիությունը 650 հազար եվրոյով վաճառքի մասին օրինագծին: Երկիրը չի մտնում ԵՄ կազմի մեջ: Նման «ոսկե անձնագիրը» կտա ոչ միայն տեղական ընտրություններում քվեարկելու, այլև առանց խոչընդոտի ողջ աշխարհում 160 երկիր այցելելու իրավունք: Այդ երկրների հետ Մալթան առանց այցագրի ռեժիմ է պահպանում:
«Առաջարկված սխեման գաղտնի է: Մալթայի քաղաքացիություն ստացողների անունները գաղտնի կմնան»,- «Իզվեստիային» հայտնել է ընդդիմադի խորհրդարանական կուսակցության ներկայացուցիչ Դևիդ Հերերան՝ նշելով, որ իրենք ավելի մեծ թափանցիկություն են ցանկանում:
Նրա խոսքով՝ քննադատություն է առաջացնում ոչ միայն ծրագրի գաղտնիությունը, այլև այն փաստը, որ քաղաքացիությունը գնապիտակ է ստանում, ինչը հակասում է սոցիալական արդարության սկզբունքին, քանի որ ծրագրով անձնագիր ստանալ կարող են միայն հարուստները:
Համաձայն օրինագծի՝ անձնագիր չեն կարող ստանալ միայն քրեական անցյալ ունեցող անձինք:
Մալթան ակնկալում է քաղաքացիության վաճառքից լուրջ շահաբաժիններ ստանալ: Հայտ ներկայացնողից բացի՝ անձնագիր կարող են ստանալ նաև նրա կինը, երեխաները և ծնողները՝ 18-50 հազար եվրոյով: Այդպիսով՝ մինչև այս տարեվերջ պետբյուջեն նախատեսվում է ավելացնել մոտ 30 մլն եվրոյով: Ծրագրվում է ապագայում տարեկան 300 անձնագիր վաճառել: Ստացված գումարները կուղղվեն «ապագա սերունդների հիմնադրամին»:
