Էլեկտրոնիկայի հարավկորեական արտադրող Samsung Electronics-ն առաջին անգամ ամբողջ աշխարհում 2013-ի երրորդ եռամսյակում բջջային հեռախոսների վաճառքի ծավալով առաջատարի դեր է ստանձնել: Այս մասին հայտնում է հարավկորեական Yonhap գործակալությունը:
2013-ի հուլիս-սեպտեմբեր ամիսների ընթացքում ընկերությունը 120.1 մլն բջջային հեռախոս է վաճառել, ինչը 16.6 տոկոսով գերազանցում է անցած տարվա ցուցանիշը: Այժմ հարավկորեական արտադրողի հեռախոսներին է բաժին ընկնում շուկայի 28.7 տոկոսը:
Գործակալության փոխանցմամբ՝ Nokia-ի վաճառքը երրորդ եռամսյակում կազմել է 64.6 մլն միավոր, իսկ Apple-ինը՝ 33.8 մլն:
Հաղորդվում է, որ երրորդ եռամսյակում Samsung Electronics-ի բջջային հեռախոսների վաճառքից ստացված շահույթը աճել է ռեկորդային՝ 26 տոկոսով և կազմել 9.6 միլիարդ դոլար:
