Ուրբաթ օրը Հայաստանի վարչապետ Կարեն Կարապետյանի և ԱՄՆ պետքարտուղարի Եվրոպայի և Եվրասիայի հարցերով փոխտեղակալի հանդիպման ժամանակ երկուստեք կարևորվել է այս տարվա մարտին Վաշինգտոնում Հայ-ամերիկյան խորհրդի երկրորդ նիստի անցկացումը: Բրիջիթ Բրինքն ընդգծել է, որ «հանդիպումից ակնկալում ենք հստակ գաղափարներ մեր տնտեսական գործընկերությունն առաջ մղելու ուղիների վերաբերյալ»: Այս թեմային մենք հանգամանալից անդրադարձել էինք` արձանագրելով, որ Վաշինգտոնն, ըստ էության, հերթական ուղերձն է հասցեագրել Երևանին:
Այսօր Հայաստանի ֆինանսների նախարար Վարդան Արամյանը լրագրողների հետ զրույցում անուղղակիորեն արձագանքել է ամերիկացի դիվանագետի խոսքին` նկատելով, որ մարտին նախատեսվող միջկառավարական հանձնաժողովի հերթական նիստի ժամանակ քննարկվելու է Հայաստանի և Ամերիկայի Միացյալ Նահանգների միջև կրկնակի հարկումը բացառող համաձայնագրի հարցը: «Մենք մշտապես մեր օրակարգում ունեցել ենք այս հարցը: Վերջին ժամանակահատվածում իմ կողմից ևս ակտիվացվել է այդ գործընթացը, ես հանդիպում եմ ունեցել ԱՄՆ դեսպանի հետ, քննարկել ենք այդ հարցերը:
Ի՞նչ եմ խնդրել մեր գործընկերներին (որովհետև ամեն տարի, կարծես, դոփում ենք նույն տեղում), որ մենք բերենք մեր փաստարկները, իրենք՝ իրենց, և դրանք համադրենք։ Ամեն դեպքում մենք վստահ ենք, որ այդ համաձայնագրի բացակայությունը խոչընդոտում է տնտեսավարող սուբյեկտների կողմից դրական որոշումներ կայացնելուն»,- ասել է նախարար Արամյանը։ Նախարարն նշել է, որ կրկնակի հարկումը բացառող համաձայնագիրը ԱՄՆ-ի հետ տնտեսական կապերը խորացնելու նոր հնարավորություն կստեղծի։
Ավելորդ չենք համարում հիշեցնել, որ ԱՄՆ կոնգրեսականներ հանրապետական Դեյվիդ Վալադոն և դեմոկրատ Բրեդ Շերմանը երկու կուսակցությունների ներկայացուցիչների ստորագրություններով նամակ են հղել ԱՄՆ ֆինանսների նախարար Սթիվեն Մնուչինին՝ կոչ անելով վերաբանակցել Հայաստանի հետ կրկնակի հարկման մասին համաձայնագիրը: Արամյանն ասել է նաև, որ ԱՄՆ ֆինանսների նախարարի կողմից դրական արձագանք է եղել այս գործընթացի առնչությամբ:
Չնայած դրան` Հայաստանի ֆինանսների նախարարի խոսքն առանձնապես լավատեսական չի եղել, որովհետև նա այդպես էլ չի կարողացել հստակ պատասխաններ տալ գործընթացի բովանդակության և ժամկետների հարցում: Հայաստանն իրականում բավականին բարդ իրավիճակում է հայտնվել Վաշինգտոնի հետ հարաբերություններում, որովհետև քաղաքական առումով ոչինչ չունի առաջարկելու, իսկ տնտեսական առումով մեր երկրի հնարավորությունները սահմանափակ են:
Թրամփի վարչակազմը շեշտը դնում է փոխշահավետ համագործակցության վրա` շեշտակի նվազեցնելով օգնության ծավալները: Անգամ հարևան երկրների հետ համեմատությունը ցույց է տալիս, որ հայ-ամերիկյան հարաբերությունները գտնվում են շատ ցածր նշաձողի, կարելի է ասել` զրոյական մակարդակի վրա: ԱՄՆ նախագահը հանդիպում է Վրաստանի վարչապետին, պետքարտուղարը` Ադրբեջանի նախագահին, իսկ Հայաստանի նախագահի ու վարչապետի հետ հանդիպում է ԱՄՆ պետքարտուղարի Եվրոպայի և Եվրասիայի հարցերով փոխտեղակալը:
Այս փաստական պատկերը շատ լավ բացահայտում է Վաշինգտոնի տարածաշրջանային առաջնահերթությունները: Իհարկե, մեղադրել պետք է ոչ թե ամերիկացիներն, այլ` մեր իշխանություններին, որոնց քաղաքականությունը համարժեք չէ ինքնիշխան երկրի չափանիշներին: Նման իրավիճակն, ըստ էության, նվազագույնի է հասցրել Հայաստանի սուբյեկտությունը` անդրադառնալով առաջին հերթին Երևանի կողմից իրականացվող արտաքին քաղաքականության որակի վրա:
Հայաստանը կարող է ԱՄՆ-ին ինչ-որ քայլեր առաջարկել բիզնեսի զարգացման ուղղությամբ և այս համատեքստում մեր իշխանություններն իսկապես պետք է հետամուտ լինեն Հայաստանի և Ամերիկայի Միացյալ Նահանգների միջև կրկնակի հարկումը բացառող համաձայնագրի ստորագրմանը` այդ նպատակին ծառայեցնելով նաև ԱՄՆ-ում հայկական լոբբիստական կազմակերպությունների և հայամետ կոնգրեսականների ջանքերը:
Մյուս կողմից` նույնիսկ այդ համաձայնագիրը չի կարող խթանել տնտեսական կապերի զարգացմանը, ներդրումների հոսքին, եթե Հայաստանի կառավարությունը քայլեր չձեռնարկի` տնտեսության կառուցվածքը փոխելու, կոռուպցիոն և մենաշնորհային երևույթներն վերացնելու ուղղությամբ: Վաշինգտոնում գերադասում են գործ ունենալ կանխատեսելի և հուսալի գործընկերոջ հետ:
