Թափանցիկությունը բացասաբար է ազդել կառավարության որակի վրա` արդարադատության նախարար Դավիթ Հարությունյանը նման կտրուկ ձևակերպմամբ խորհրդարանական երեկվա հարց ու պատասխանի ժամանակ հիմնավորեց` ապրիլից կառավարության նիստերը դռնփակ անցկացնելու օրենսդրական նախաձեռնությունը: Հարությունյանը կաբինետի ամենաինտելեկտուալ անդամներից մեկն է և, անշուշտ, ցանկության դեպքում, իշխանությունների որոշումը կարող էր մոտիվացնել շատ ավելի ռացիոնալ, կառուցողական հարթության վրա: Սակայն արդարադատության նախարարն, ըստ ամենայնի, միտումնավոր է ընտրել, այսպես ասած, անտագոնիստական, ինչ-որ իմաստով ոչ ռացիոնալ ու ռեակցիոն պատասխան` թերևս, ցույց տալու համար, որ գործ ունենք ոչ թե կառավարության հերթապահ օրենսդրական նախաձեռնության, այլ` նոր «գաղափարախոսության» հետ, որն, ի դեպ, նախապատմություն և ակունք ունի:
Դեռևս տարիներ առաջ Սերժ Սարգսյանը ԶԼՄ-ներին մեղադրել էր երկրում, իր իսկ ձևակերպմամբ, գաղջ մթնոլորտ ձևավորելու համար: Ավտորիտար քաղաքական «մշակույթին» բնորոշ մենթալիտետ է, երբ իշխանությունը մտածում է ոչ թե կոնկրետ պրոբլեմները լուծելու, այլ դրանց հրապարակայնացնումը կանխելու մասին: Կոպիտ ասած` իշխանությունը կարծում է, որ խնդիրն ոչ թե իր այլանդակ պատկերն է, այլ` այն արտացոլող հայելին: Կառավարության նիստերը դռնփակ անցկացնելու նախաձեռնությունը և Դավիթ Հարությունյանի երեկվա «թափանցիկ» ակնարկը Սերժ Սարգսյանի «գաղջ մթնոլորտի» մենթալ մտածողության առարկայական դրսևորումներն են:
Առիթ ունեցել ենք նկատելու, որ հայկական պառլամենտական մոդելը ունիկալ է, որովհետև դրանում իշխանության հիմնական սուբյեկտը ոչ թե խորհրդարանն ու նրա մեծամասնությունն են, այլ` վարչապետը, ով ավելի մեծ լիազորություններ է ունենալու, քան նույնիսկ` նախագահը պետական այսօրվա համակարգում: Քաղաքակիրթ աշխարհում ժողովրդավարությունն ու թափանցիկությունը համարվում են զարգացման նախապայման, Հայաստանում` որակի թշնամի:
Հենց այստեղ էլ, կարծում ենք, անիմաստ է դառնում միջազգային փորձի վկայակոչումը, որովհետև հայկական «պառլամենտարիզմի» ընդերքում դրվում է, այսպես կոչված, վոժդիզմի գաղափարը, որի համար` օֆիցիոզ պատկերացումից դուրս, իրականության ցանկացած մատուցում «գաղջ մթնոլորտ» է, «անպետք թափանցիկություն», որը բացասաբար է անդրադառնում կառավարության որակի վրա: Դավիթ Հարությունյանը երեկ խորհրդարանական ամբիոնից ընդամենը բացահայտում էր հայկական «պառլամենտարիզմի» կամ վոժդիզմի ինստիտուցիոնալ հիմքերից մեկը:
ՀՀԿ-ն նոր վարչապետի հարցով դեռևս Գործադիր մարմնի նիստ չի անցկացրել, համենայն դեպս` Էդուարդ Շարմազանովն այդ մասին հանրությանը չի իրազեկել, սակայն ակնհայտ է, թե որ վարչապետի վարած կառավարության նիստերն են ապահովագրվում «գաղջ մթնոլորտի» տեսարանների վերածվելու ռիսկերից:
