«Առաջին լրատվական»–ի զրուցակիցն է Ռուսաստանի ռազմավարական զարգացման ինստիտուտի գլխավոր տնօրեն Անդրանիկ Նիկողոսյանը:
–Պարոն Նիկողոսյան, Ռուսաստանում հերթական ստորագրահավաքն է սկսվել՝ Երևանում Նժդեհի արձանն ապամոնտաժելու պահանջով: Անգամ կլոր սեղան է անցկացվել ՌԴ պետդումայում: Ինչպե՞ս եք գնահատում: Ինչո՞ւ Ռուսաստանի այդ քայլից բխող գործողություն սեփական ինքնիշխանությունն ու սուվերենությունը բարձրացնող քայլեր ու գործողություններ չի ձեռնարկվում:
-Հիմա սկսվել է պրոցես, ընթանում է ստորագրահավաք: Նախ և առաջ, դրանով պետք է զբաղվի Ռուսաստանում հայկական համայնքը և Ռուսաստանում ՀՀ դեսպանատունը: Բացի այդ, ինչպես նախկինում էլ նշել եմ, թելադրյալ ստորագրահավաքներ են: Ովքե՞ր են գալու այդ արձանը հանելու: Մենք պետք է դրան տեղիք չտանք:
-Դուք էլ այն կարծիքին եք, թե դա ադրբեջանական քարոզչամեքենայի գործունեության դրսևորո՞ւմ է: Էդվարդ Նալբանդյանն էլ նման կարծիք էր հայտնել և նշել՝ ցանկալի չէ հայտնվել այդ խայծը կուլ տվածի կարգավիճակում:
-Իհարկե: Ռուսաստանը բազմազգ երկիր է, և միայն ռուսներ չեն ապրում: Ապրում են միլիոնավոր թուրքեր և ադրբեջանցիներ, այլ ազգեր, որոնք մեզ հետ հիմա թշնամական գործողությունների մեջ են: Մենք դրա դեմ պետք է պայքարենք խելացի, ոչ թե կռիվ տանք և դուրս գանք ռուսների դեմ: Նրանք ռուսներ չեն: Եվ ես այդ կերպ եմ պատկերացնում:
–Ի՞նչ պետք է անել դրան հակադարձելու համար:
-Դրա պատասխանը պետք է տա Հայաստանի ԱԳՆ-ն, դեսպանությունը, հայկական համայնքը, համայնքի նախագահը: Այ իրենք պետք է մտածեն՝ ինչ պետք է անել, որովհետև այդ ամենը պետք է ուղղորդվի Հայաստանի կողմից, ոչ թե Ռուսաստանի:
-Կարծում եք՝ թերացե՞լ են աշխատանքում:
-Իմ կարծիքով՝ ոչ թե թերացել ենք, այլ նաև շատ ուշացել ենք, վաղն էլ կարող է ասեն՝ ուրիշ արձան հանեք՝ Անդրանիկի արձանը հանեք: Ստորագրահավաք են անում. հետո, ինչ ենք անելու, վերջը ի՞նչ է լինելու:
-Հակահայկական տրամադրություններ հատկապես նոյեմբերից հետո նկատո՞ւմ եք:
-Հակահայկական տրամադրություններ չկան, հակահայկական տրամադրությունները գնում են վիրտուալ դաշտում, ընդամենը մի քանի հոգի խոսում են Երևանից, մի քանի հոգի էլ խոսում են Ռուսաստանից: Իսկ ընդհանուր ժողովուրդը ապրում է իր համար հանգիստ, իր համար ստեղծում է, արարում է, ապրում է, առօրյա հոգսերով են զբաղված, ընդհանրապես քաղաքականությամբ չեն էլ զբաղվում, իրենք առօրյա հոգսերով են զբաղված: Ճիշտ է, մտահոգված են պատմական հայրենիքով, Հայաստանով, հայ ժողովրդի ճակատագրով, բայց այնքան հոգսեր ունեն, որ զբաղված են իրենց հոգսերով:
-Հունվարի 19-ին Ադրբեջանը հերթական ԲՏՌ 82Ա խմբաքանակը ստացավ Ռուսաստանից։ Այս քայլը ինչպե՞ս եք գնահատում:
-Սա Ռուսաստանի արտաքին ռազմավարական քաղաքականությունն է, որը ոչ ոք չի կարող փոխել: Նույն Ադրբեջանն էլ Ռուսաստանի համար համարվում է բարեկամանական, ռազմավարական գործընկեր: Մենք պետք է մեր ներսում ավելի լավ աշխատենք, որ նույն ռազմատեխնիկան էլ ավելի շատ բերենք Հայաստան, ոչ թե սկսենք մտածել՝ ով ում ինչի է տալիս: Կամ Ալիևը, ասում են, էս ինչ բանը հայտարարեց, մենք չպետք է ուշադրություն դարձնենք Ալիևի ասածներին, մենք պետք է ուշադրություն դարձնենք և հետևենք մեր նախագահին, թե նա ինչ է ասում:
-Բայց չէ՞ որ որպես ԵԱՀԿ Մինսկի խմբի համանախագահող երկիր, Ռուսաստանը խախտում է պայմանավորվածությունը:
-Ես չեմ տեսնում, որ բալանսը խախտվում է, ես տեսնում եմ, որ այդ բալանսը գնալով կարգավորվում է: Եվ մենք չգիտենք՝ Հայաստանն ինչ զենքեր է ստանում, օրինակ, ես չգիտեմ:
Արցախյան խնդրով զբաղվում է ԵԱՀԿ Մինսկի խումբը, որի անդամներից մեկն էլ Ռուսաստանն է, և որի վրա դրված է ավելի ակտիվ բանակցություններ վարել խնդրի լուծման համար: Ռուսաստանի ցանկացած քայլ, իմ կարծիքով, համաձայնեցված է ԵԱՀԿ խմբի համանախագահների հետ: Ռուսաստանը ինքնագլուխ որևէ բան չի անում: Մենք մեր մեջ պետք է ման գանք խնդիրը, մենք պետք է համախմբվենք, մենք համախմբման կարիք ունենք, որը, ցավոք սրտի, շատ դժվար է, բայց հնարավոր է:
-ԱՄՆ-ն հրապարակեց ՌԴ պաշտոնյաների և գործարարների պատժամիջոցների ցանկը: Սա ի՞նչ հետևանք կունենա Հայաստանի վրա:
-Բնականաբար, այդ հետևանքները ավելի կխորանան, բայց Հայաստանի վրա ազդեցություն չի ունենա, մենք Ռուսաստանի հետ պետք է մեր առևտուրը զարգացնենք: Հիմա աշխարհի երկու գերհզոր պետություններ կիրառում են իրար նկատմամբ սանկցիաներ, թող անեն, և մենք այս առիթից պետք է օգտվենք և շահած դուրս գանք: Այս սանկցիաները, ի վերջո, ոչ թե Հայաստանի, այլ Ռուսաստանի հանդեպ են կիրառվել: Հիմա գետի վարարման պահն է, մենք պետք է շատ զգոն և զգույշ լինենք:
