Քրեակատարողական հիմնարկների բեռնաթափումը խնդրի լուծում չէ, քանի որ կալանավորների թիվը շատ արագ կարող է վերականգնվել: «Առաջին լրատվական»-ի հետ զրույցում այս մասին ասաց «Քաղաքացիական հասարակության ինստիտուտ» հ/կ նախագահ Արման Դանիելյանը՝ անդրադառնալով ՀՀ արդարադատության նախարար Հրայր Թովմասյանի այն հայտարարությանը, թե վերջին համաներումից հետո կալանավայրերում գերբեռնվածության խնդիր չկա:
«Քրեակատարողական հիմնարկների գերբեռնվածության խնդիրը լուծելու համար պետք է գործարկել այնպիսի մեխանիզմներ, որ այսչափ մարդիկ բանտերում չհայտնվեն կամ բանտերից շուտ դուրս գան: Այդ նպատակով պետք է գործեն այլընտրանքային խափանման միջոցների, այլընտրանքային պատիժների և վաղաժամկետ ազատ արձակման համակարգերը: Այս դեպքում կարիք չի լինի գումարներ ծախսել և անընդհատ նոր կալանավայրեր կառուցել»,- ասաց Արման Դանիելյանը:
Նա միաժամանակ սխալ համարեց թեթև հանցագործություններ կատարած անձանց ընդհանրապես կալանքից ազատելու փաստը: «Դա ճիշտ չի լինի: Ամեն անգամ պետք է գնահատես հանցագործություն կատարածի անձը և որոշես՝ արդյոք այդ մարդը պե՞տք է ՔԿՀ-ում մնա, թե՞ կարող է գտնվել ազատության մեջ և այնտեղ քավել իր մեղքը»,- նշեց Արման Դանիելյանը՝ հավելելով, որ ինքը դեմ չէ ավելի լավ պայմաններով ՔԿՀ-ների կառուցմանը և կալանավորներին այնտեղ տեղափոխելուն:
Հիշեցնենք, որ Անկախության 22-ամյակի առթիվ հայտարարված համաներման արդյունքում, ըստ Թովմասյանի, պետք է ազատ արձակվեր մոտ 500-600 մարդ, իսկ ընդհանուր առմամբ համաներումը պետք է տարածվեր 1000-ից ավելի անձանց վրա:
Հրայր Թովմասյանի խոսքով՝ օպտիմալացման արդյունքում ՔԿՀ-ների թիվը 13-ից պետք է դառնա 5: Դրանք կունենան բոլոր ռեժիմները և ամբողջ ծավալով կապահովեն անհրաժեշտ ծառայությունները։
Դա էլ, նախարարի խոսքով, հնարավորություն կտա 1,5 մլրդ դրամ խնայել:
Հիշեցնենք նաև, որ համաներումը կիրականացվի մինչև դեկտեմբերի 25-ը: Իսկ ահա 2014 թվականի հունվարի 1-ից կգործարկվի «Արմավիր» ՔԿՀ-ն:
