Միացյալ Նահանգների ֆինանսների նախարարությունը Պատժամիջոցների մասին օրենքի շրջանակում նախօրեին հրապարակել է «կրեմլյան ցուցակ», որում ընդգրկված են ռուսաստանցի 96 խոշոր գործարար, 114 պաշտոնյա և պետական ընկերությունների ղեկավարներ:
Երեկ հայտնի դարձավ, որ այդ ցանկում ընդգրկված են նաև ռուսաստանաբնակ հայ գործարարներ Սամվել Կարապետյանը, Դանիլ Խաչատուրովը ու Սերգեյ Գալիցկին։ Երեկ հայտնի դարձավ նաև, որ չորս ամերիկացի հանրապետական սենատորներ՝ Գրեմը, Ռուբիոն, Գարդները և Ուիկերը բաց նամակ են հղել պետքարտուղար Ռեքս Թիլերսոնին և կոչ են արել ուշադրություն դարձնել Ռուսաստանի գլխավոր դատախազ Յուրի Չայկային, նրա որդի Արտեմին, որդու բիզնես-գործընկեր Կամո Ավագումյանին, գլխավոր դատախազի տեղակալ Գենադիի նախկին կնոջը՝ Լոպատինա Օլգային, ինչպես նաև ձեռնարկատեր Ալիշեր Ուսմանովին։ Արդյոք այդ ցուցակը, որը դեռ պատժամիջոց չէ, սակայն իր մեջ շատ կարևոր ուղերձ և զգուշացում է պարունակում, ուղղակի կամ անուղղակի ազդեցություն կունենա Հայաստանի վրա, որն ամենամեծ կախվածությունն ունի Ռուսաստանից՝ թե՛ քաղաքական, թե՛ ռազմական և թե՛ տնտեսական իմաստով։
Դրան զուգահեռ՝ ԱՄՆ-ը երեկ ձեռնպահ է մնացել ՌԴ պաշտպանական ձեռնարկությունների հետ գործակցության համար պատժամիջոց սահմանելուց, որ նախատեսված է դեռևս հուլիսին ընդունված օրենքով: Թրամփի ադմինիստրացիան ասել է, որ առայժմ չկա դրա անհրաժեշտությունը: Սակայն Նահանգները ցանկացած պահի կարող է կիրառել պատժամիջոցներ ռուսական մի շարք պաշտպանական, ռազմաարդյունաբերական ձեռնարկությունների հետ գործակցող ընկերությունների ու երկրների համար, ինչը, անկասկած, իր ազդեցությունը կունենա Ղարաբաղյան հակամարտության վրա։
Թեման քննարկելու ենք Նյու Յորքում բնակվող քաղաքագիտության դոկտոր Հայկ Մարտիրոսյանի հետ, որի հետ կապ ենք հաստատել տեսակապի միջոցով։
