Թերթը գրում է, որ հունիսի 22-ին ԵԽԽՎ Վեհաժողովի լիագումար նիստում այս անգամ ելույթ է ունենալու նախագահ Սերժ Սարգսյանը: Թերթի զրուցակցի հավաստմամբ՝ Ս. Սարգսյանը ԵԽ-ում ներկայացնելու է վերջին տարիներին Հայաստանում կատարված թե օրենսդրական, թե ներքաղաքական լարվածությունը թուլացնելուն ուղղված քայլերը՝ ներառյալ Ազատության հրապարակում ընդդիմությանը հանրահավաքներ անցկացնելու հնարավորության տրամադրումը ու համաներման արդյունքում կալանավայրերից քաղբանտարկյալների ազատ արձակումը։
Իսկ ինչ վերաբերում է պատվիրակությունների մակարդակով բանակցելու ՀԱԿ-ի առաջարկին, ապա, թերթի զրուցակիցների հավաստմամբ՝ կոնկրետ պատասխան այդ առումով Ս. Սարգսյանը չի հնչեցնելու: Նրանց հավաստմամբ՝ Ս.Սարգսյանը ընդամենը հայտարարելու է, որ անցած երեք տարիների ընթացքում ինքը մշտապես հայտարարել է, որ երկխոսության ջատագովն է եղել, և արդեն ԵԽԽՎ ամբիոնից կվերահաստատի, որ պատրաստ է ցանկացած քաղաքական ուժի հետ բաց երկխոսության՝ առանց պատվիրակների, որն իր մեջ «գաղտնիության», այսինքն՝ ոչ թափանցիկության տարրեր է պարունակում: Նույն աղբյուրների փոխանցմամբ՝ Ս.Սարգսյանը նաև հայտարարելու է, որ այս ընթացքում արդեն իսկ ընդդիմության հետ տեղի է ունենում բաց երկխոսություն (վկայակոչելով ընդդիմության պահանջների կատարումը), որը «պատվիրակների կազմի» տակ քողարկելու անհրաժեշտություն ինքը չի տեսնում: «Կոալիցիոն ուժերի ներկայացուցիչների խոսքով՝ ԵԽԽՎ-ում նման հայտարարությունը չի կարող «ծափերի» չարժանանալ, քանի որ դրանով Ս.Սարգսյանը կփորձի ցույց տալ, թե ի տարբերություն Հայաստանի ընդդիմության՝ որքան թափանցիկ, բաց երկխոսության կողմնակից է ինքը»,- գրում է թերթը և հավելում. «Ի դեպ, մեր աղբյուրների փոխանցմամբ՝ Ս.Սարգսյանը ԵԽԽՎ-ում Հայ ազգային կոնգրեսի անունը չի ընդգծելու և խոսելու է ընդհանուր ընդդիմության մասին: Բացի այս, մեր աղբյուրների փոխանցմամբ՝ Ս.Սարգսյանը նաև հայտարարելու է, որ իշխանական տարբեր մակարդակի գործիչներ, այդ թվում՝ ՀՀ նախագահի աշխատակազմի ղեկավարը, հայտարարել են, որ ընդդիմության ներկայացրած բոլոր առաջարկները, քանի հոգանոց խմբերով էլ ներկայացվեն, որ ոլորտներին էլ վերաբերեն (քաղաքական, տնտեսական, սոցիալական), Հայաստանի համապատասխան պետական կառույցները, գերատեսչությունները պատրաստ են քննարկել և համատեղ լուծումներ առաջարկել, ինչը, սակայն, ընդդիմությունը գոհացուցիչ չի համարում: Ըստ իշխանությունների՝ բանակցություն պետք է տեղի ունենա հասարակության դժգոհ զանգվածի և պետության միջև, ուստի իրենք իրենց կողմից որպես «պատվիրակներ»՝ առաջարկում են պետության բոլոր պետական մարմինների ղեկավարներին»:
«Մեր պատասխանն, ըստ էության, ՀԱԿ-ին, հետևյալն է. եթե կոնկրետ դժգոհություն կամ առաջարկ ունեք Աժ-ին, ապա ասում ենք՝ դիմեք Աժ նախագահ Հովիկ Աբրահամյանին: Եթե քաղաքաշինության նախարարությանը, ապա՝ Վարդան Վարդանյանին»,- ասել է թերթի զրուցակիցը՝ միաժամանակ բացառելով, որ ՀԱԿ-ի հետ երկխոսություն կարող է ծավալել նաև արտահերթ ընտրությունների շուրջ: «Ավելին՝ մեր զրուցակցի խոսքով՝ հնարավոր է նաև, որ Ս. Սարգսյանը ԵԽ ԽՎ-ում հայտարարի, որ պատրաստ է անձամբ բաց ձևաչափով, ինչպես այսօր է՝ երկխոսել ՀԱԿ-ի հետ, եթե նրանց առաջ քաշած հարցը կամ հարցերը վերաբերում են նախագահի աշխատակազմում առկա խնդիրներին»,- գրում է «168 ժամ»-ը:
