Դոնալդ Թրամփը խոստովանել է, որ նա «շատ պրոբլեմներ ունի ԵՄ–ի հետ» ապրանքաշրջանառության հարցերում, – գրում է Daily Mail-ը։
«Եվրամիությունը շատ անազնիվ է վարվում ԱՄՆի հետ՝ առևտրի հետ կապված հարցերում»,–ասել է նա՝ բրիտանացի լրագրող Փիրս Մորգանին տված հարցազրույցում։ ԱՄՆ ղեկավարը ընդգծել է, որ ամերիկյան արտադրանքը շատ դժվարությամբ է մուտք գործում ԵՄ շուկա։ «Այնուամենայնիվ, իրենք ուղարկում են մեզ իրենց ապրանքը՝ առանց հարկերի, շատ փոքր հարկերով։ Դա շատ անարդար է»,– ընդգծել է Թրամփը։ Նա նաև նշել է, որ միայն ԵՄ երկրները չեն, որ այդ հարցում անազնիվ են վարվում ԱՄՆ–ի հետ։ Սակայն թե էլ որ պետություններն են մտնում այդ կատեգորիայի մեջ, ԱՄՆ նախագահը չի մանրամասնել։ Ինչ վերաբերում է Brexit-ի հարցով Բրիտանիայի բանակցություններին, Թրամփը հայտարարել է, որ ինքը դրանք այլ կերպ կվարեր։ «Ես ավելի խիստ դիրքորոշում կընդունեի ԵՄ–ից դուրս գալու հարցում»,– ասել է նա։
