«ԱՄՆ-ի կողմից այսօր Հայոց ցեղասպանության ճանաչումն ես շատ քիչ հավանական եմ համարում, որովհետև Դոնալդ Թրամփն այն նախագահներից է, որի հետ մեր հայկական լոբբին այդպես էլ չգտավ համագործակցելու եզրեր․ ԱՄՆ-ի գրեթե բոլոր նախագահները նախկինում այս կամ այն ձևով անդրադարձել էին Հայոց Ցեղասպանության խնդրին՝ հայկական համայնքի ճնշման ներքո կամ նրանց ազդեցությունը հաշվի առնելով, օրինակ՝ Բարաք Օբամայի կողմից անգամ հստակ խոստում կար՝ նախագահ ընտրվելու դեպքում ի վերջո արտասանել «Ցեղասպանություն» բառը, բայց Թրամփի պարագայում մենք նման բան չենք տեսնում»,- «Առաջին լրատվական»-ի հետ զրույցում այսպիսի կարծիք հայտնեց ցեղասպանագետ Սուրեն Մանուկյանը։
Այս համատեքստում վերջինս նաև հիշեցնում է, որ անգամ նախընտրական քարոզարշավի ժամանակ Թրամփը նույնիսկ չհանդիպեց ԱՄՆ-ի հայկական համայնքի ներկայացուցիչների հետ, ինչպես օրինակ լինում էր նախորդ նախագահների պարագայում։
«Ցավոք սրտի, կարող ենք արձանագրել, որ այսօր ԱՄՆ-ում հայկական համայնքը քաղաքական առումով շատ թույլ է։ Բացի դրանից որքան էլ որ Թրամփին վերաբերվենք որպես էքսցենտրիկ անձնավորության, միևնույնն է՝ նա այս մեկ տարվա ընթացքում ցույց է տվել, որ ինքն իր նախընտրական ծրագրում ամրագրված խոստումները հատ առ հատ իրականացնում է և իրականացնելու է․ եթե մենք հայերս կարողանայինք ժամանակին կողմնորոշվել և հասկանալ, որ Թրամփն ունի շատ մեծ շանսեր ընտրվելու և ամբողջ մեր ներուժը կենտրոնացնեինք նրան աջակցություն ցույց տալու և ըստ այդմ՝ Հայոց ցեղասպանության ճանաչման խոստումը նրանից ստանալու հարցում, ապա ես համոզված եմ, գրեթե կասկած չունեմ, որ նա կգնար այդ քայլին և կճանաչեր Հայոց ցեղասպանությունը»,- շեշտեց Սուրեն Մանուկյանը։
Մանրամասները՝ տեսանյութում։
