Բոննի միջազգային կոնվերսիայի կենտրոնը (BICC) հրապարակել է «Ռազմականացման գլոբալ ինդեքս-2013» (Global Militarization Index 2013) ամենամյա զեկույցը: Նման վարկանիշները կազմվում են 1996թ. սկսած:
Ռազմականացման գլոբալ ինդեքսը մշակվել է դեռևս 1990թ.: Այն ունիվերսալ գործիք է՝ աշխարհի երկրների ռազմականացման մակարդակի և սոցիալական զարգացման միջև հավասարակշռությունը գնահատելու համար: Ինդեքսի ամփոփ նշանակությունը հաշվելու համար գնահատվում են վեց ցուցանիշները, որոնք միավորված են երեք բաղադրիչներում՝ ռազմական ծախսեր, զինված ուժեր և պետության ծանր սպառազինում:
Վարկանիշային աղյուսակում Հայաստանը զբաղեցրել է չորրորդ հորիզոնականը (724.12 միավոր), որին հետևում է Սիրիան:
Նշվում է, որ 2013թ. սկսած Հայաստանի համար տվյալների մեջ ներառվում են պահուստայինները, այդ պատճառով երկիրն այս տարի վարկանիշային աղյուսակում ավելի բարձր տեղ է զբաղեցրել նախորդ տարիների համեմատ:
Հայաստանի հարևան Ադրբեջանը վարկանիշային աղյուսակում զբաղեցրել է 8-րդ հորիզոնականը (673.32 միավոր): Նշվում է, որ Կովկասում ռազմական պոտենցիալի աճն ուղեկցվում է Լեռնային Ղարաբաղի համար երկարաժամկետ ռազմական հակամարտության առաջացման վտանգով:
Աշխարհի ամենառազմականացված երկիրը վեցերորդ անգամ անընդմեջ ճանաչվել է Իսրայելը (794 միավոր), որին հետևում են Սինգապուրը (752միավոր) և Ռուսաստանը (729 միավոր):
Հայաստանի մյուս հարևանները՝ Թուրքիան, Իրանը, Վրաստանը, համապատասխանաբար զբաղեցրել են 23-րդ (592.81 միավոր), 28-րդ (564.5 միավոր) և 54-րդ (501.35 միավոր) հորիզոնականները:
Զեկույցի համաձայն՝ ամենաքիչ ռազմականացված երկրներն են Սիեռա Լեոնեն (207), Լիբերիանը (176), Պապուա Նոր Գվինեան (153): 149 երկրներից բաղկացած գլոբալ ցուցակը եզրափակում է Իսլանդիան, որը դե յուրե մշտական զինված ուժեր չունի:
