«ՌԴ-ն Ադրբեջանին զրահատեխնիկայի նոր խմբաքանակ է մատակարարել նախկին պայմանավորվածությունների շրջանակում, դա պլանային մատակարարում էր»։ Այս մասին «Առաջին լրատվական»-ի հետ զրույցում ասաց քաղաքագետ, ռազմական փորձագետ Հրանտ Մելիք-Շահնազարյանը։ Նրա դիտարկմամբ՝ թեև այս անգամ դեռ պաշտոնապես չենք արձագանքել, բայց մի քանի անգամ անգամ նախագահի, արտգործնախարարի մակարդակով հնչեցվել է, որ դժգոհ ենք ՌԴ-ի այդպիսի վարքագծից։
«Չգիտեմ՝ հիմա ինչու չեն արձագանքում, բայց ցանկացած նման առիթ պետք է օգտագործենք՝ հորդորելով ՌԴ-ին զերծ մնալ զենքի, հատկապես հարձակողական զենքի մատակարարումից»,- շեշտեց քաղաքագետը։
Քաղաքագետի դիտարկմամբ՝ ՌԴ-ն կոնֆլիկտը դիտարկում է որպես զենք-զինամթերքի վաճառքի, դրա միջոցով տարածաշրջանում ազդեցությունը մեծացնելու միջոց։
Անդրադառնալով Ադրբեջանի կողմից լայնամասշտաբ գործողությունների պատրաստման հնարավորությանը՝ Հրանտ Մելիք-Շահնազարյանը ասաց. «Ադրբեջանը գրեթե վերջին 30 տարիներին լայնամասշտաբ գործողությունների է պատրաստվում, մեկ անգամ դրա ձախողումը եղավ։ Շատ եմ խոսել այն մասին, որ այսօր Ադրբեջանը շատ ավելի լուրջ պատճառներ ունի պատերազմը վերսկսելու, քան 2016 թ.-ի ապրիլին էր, որովհետև մեծ հաշվով ձախողելով հարձակումը՝ բանակցությունների սեղանին բավականին լուրջ հարցեր շահարկելու հնարավորությունից զրկվել է, և իրենց պետք է իրավիճակի ցանկացած փոփոխություն»,- ընդգծեց նա։
Մանրամասները՝ տեսանյութում: