«Ռուսներ» ազգայնական կոալիցիան հայտարարել է, որ հունիսի 11-ին նախապատրաստում են գնդապետ Բուդանովի հիշատակի միջոցառումներ Մոսկվայի կենտրոնական «Մանեժնայա» հրապարակում: Այս մասին Gazeta.ru կայքին ասել է կոալիցիայի համանախագահ Դմիտրի Դեմուշկինը:
Ավելի վաղ հայտնի էր դարձել, որ «Պուշկինսկայա» հրապարակում շաբաթ օրը ակցիա է նախապատրաստում Ժիրինովսկու կուսակցությունը: «Ռուս ժողովրդի օր» անունը կրող ակցիան այնուամենայնիվ անցկացվելու է, չնայած ոստիկանության զգուշացումներին, որ կարող են բախումներ հրահրվել:
Հիշեցնենք, որ Հունիսի 10-ին Մոսկվայում հայտնաբերել էին մի տղամարդու դիակ, որի մարմնի վրա կար 6 հրազենային վնասվածք: Հետագայում պարզվել է, որ դա Ռուսաստանում հայտնի գնդապետ Յուրի Բուդանովն է: Բուդանովի գործը մեծ աղմուկ էր հանել Ռուսաստանում: 2003 թ.-ին նա դատապարտվել էր 10 տարվա ազատազրկման 18-ամյա չեչենուհի Էլզա Կունագաևայի սպանության համար: Վերջինիս Բուդանովը համարում էր դիպուկահար: Դատապարտելուց հետո գնդապետին զրկել էին պաշտոնից և կոչումից: 2009 թ.-ին նա վաղաժամ ազատ էր արձակվել: