Ազատության հրապարակում նոյեմբերի 7-ին ազատամարտիկների հանրահավաքի ժամանակ «Ղարաբաղ» կոմիտեի անդամ Աշոտ Մանուչարյանը նշեց, որ դեռևս երկու օր առաջ Հայաստանն ուրիշ վիճակի մեջ էր, ուրեմն՝ ինչ է կատարվել, որ ամենուրեք այնպիսի զգացում կա, որ ուրիշ Հայաստանում ենք:
«Կատարվել է մեկ բան. մեր երիտասարդությունը 25 տարի է՝ սպասում է, որ հայերը վերջապես կստեղծեն այն պետությունը, որը խոստացել էին՝ ազատ, անկախ Հայաստանը, ճշմարիտ Հայաստանը: Սկզբից խոսում էին և խոստանում իշխանավորները, հետո, երբ իշխանությունները դարձան հանցագործ, նույն բանի մասին խոստումներ են տալիս քաղաքական ուժերը»,- ասաց նա:
Մանուչարյանի խոսքով՝ հասարակության ներկայացուցիչները տարբեր մեթոդներով գործում էին, բայց պարզվեց՝ ոչ մի մեթոդ չի աշխատում, Հայաստանում գնալով սանձարձակությունը, «բեսպրեդելը» դառնում է հիմնական որակ, մարդիկ կարծում են՝ իրենց ամեն ինչ թույլատրված է, ցինիզմի վերջին աստիճանն է, ամենակարևորը՝ արդեն իրենք էլ հայ մարդիկ չեն, խամաճիկ են դարձել դրսի ձեռքում:
«Այս իրավիճակն այլևս երիտասարդությունը չի հանդուրժում: Շանթը ինչքան էլ դառնա հիսուն-վաթսուն-յոթանասուն տարեկան, մնում է նույն Շանթիկը, նույն շանթահարողը, ազնիվ սրտի-հոգու մարդը»,- ասաց նա:
Մանրամասները՝ տեսանյութում:
