Մամուլը Հայաստանում ուժ չունի, քանի որ խոսքի ազատությունը ձևական բնույթ է կրում և իրավական հետևանքներ չի ունենում: Այսօր տեղի ունեցած մամուլի ասուլիսի ժամանակ նման տեսակետ հայտնեց սոցիոլոգ, հրապարակախոս Կարինե Հակոբյանը՝ հավելելով, որ անկախ լինելու համար մամուլը պետք է պատշաճ ֆինանսավորում ստանա:
Ասուլիսի մյուս բանախոս, ԵՊՄՀ-ի բնապահպանության ամբիոնի վարիչ, բնապահպանական գիտությունների դոկտոր, պրոֆեսոր Կարինե Դանիելյանը, անդրադառնալով նախկին ոստիկան Շանթ Հարությունյանի բողոքի գործողություններին, նկատեց, որ նրա արարքի դրսևորումը խուլիգանական էր, էությունը՝ ճիշտ:
Հրապարակախոս Կարինե Հակոբյանն էլ իր հերթին նկատեց, որ արարքն իր բովանդակությամբ խուլիգանություն չէր: «Այլ բան էր արտահայտչամիջոցների ընտրությունը»,- ասաց նա:
Հիշեցննեք, որ նախկին քաղբանտարկյալ, «7-ի գործով» նախկինում մեղադրվող, «Ցեղակրոն» կուսակցության նախագահ Շանթ Հարությունյանի կազմակերպած ակցիան օրերս վերածվել էր զանգվածային անկարգությունների:
Չլսելով ոստիկաններին՝ Շանթ Հարությունյանն ու իր համախոհները Ազատության հրապարակից շարժվել էին դեպի Մաշտոցի պողոտա: Ոստիկանները չէին կարողացել փակել նրանց ճանապարհը, ակտիվիստների և նրանց միջև բախումներ էին սկսվել, ինչի արդյունքում 20-ից ավելի մարդ բերման էր ենթարկվել:
Ակտիվիստները Մաշտոցի պողոտա էին բերել նաև պայթուցիկ նյութեր, որոնք պայթեցրել էին ոստիկանների ոտքերի տակ:
Դեպքի վայր էին ժամանել նաև կարմիր բերետավորները, ոստիկանական տարբեր ստորաբաժանումների ուժեր, ինչպես նաև ՌՈ-ի ուժերը:
Լուսանկարը՝ Photolure-ի
