ԱԺ ՀՀԿ խմբակցության պատգամավոր Վարդան Այվազյանը նախօրեին Մաշտոցի պողոտայում տեղի ունեցածը չի համարում քաղաքական ակցիա, իսկ այն հեղափոխության սկիզբ համարելու դիտարկումը համարում է ծիծաղելի: Այսօր Ազգային ժողովում լրագրողների հետ ճեպազրույցում Այվազյանը նշեց, որ երեկվա իրադարձությունները պարզապես բողոքի արտահայտման ձև էին:
«Ոնց ասեմ ախր Ձեզ. որևէ ուղիղ համեմատական հեղափոխության փորձի ու անկարգության այդ փոքր դրսևորման միջև չկա: Դա, ինձ թվում է, ոմանց բողոքի արտահայտման ձևն էր, բայց ոչ ճիշտ տարբերակով՝ մահակներ… Չգիտեմ, ինչո՞ւ էին այդ ձևն ընտրել, բայց ամեն մեկը սեփական քայլի համար է պատասխանատու»,- ասաց նա:
Հարցին՝ չի՞ կարծում արդյոք, որ մարդկանց համբերության բաժակն արդեն լցվել է, Այվազյանը պատասխանեց, որ հենց իրենից՝ Շանթ Հարությունյանից պետք է հարցնել: Ոստիկանության գործողությունները ՀՀԿ-ական պատգամավորը համարում է իրավաչափ: Լրատվության հետ ծանոթանալով՝ նա կարծում է, որ աղմուկի ու մահակներով գործողությունների վիճակում ոստիկանությունը պարտավոր էր պահպանել հասարակական կարգը:
Դիտարկմանը, թե բերման ենթարկվածներից շատերն անմեղ էին, Այվազյանը նշեց, որ տեղեկացված չէ: «Դուք ավելի լավ տեղեկացված կլինեք, բայց կրկնում եմ՝ այն, ինչ ես տեսել եմ, համարժեք էր ոստիկանության իրականացրած գործողություններին, որովհետև մահակներով մարդիկ փորձում էին բողոքել, իսկ դա դուրս էր ընդունված կանոններից, նորմերից: Ասում եք՝ մարդկանց համբերության բաժակը լցվել է, բայց լցվել է նաև հասարակական կարգը պահողների բաժակը: Այնպես չէ, որ… ես չեմ ուզում ավելորդ պիտակավորումներ տալ, բայց եղած գործողություններին համապատասխան էին»,- ասաց նա:
Լրագրողներին հետաքրքրեց, թե պատգամավորի համար զարմանալի չէ՞ր արդյոք այն փաստը, որ միջադեպի արդյունքում միայն ոստիկաններն են վնասվածքներ ստացել, ինչին ի պատասխան՝ Այվազյանը խորհուրդ տվեց հարցն ուղղել նման տեղեկատվություն տրամադրողներին:
«Ես կոֆեի բաժակի մեջ ենթադրություններ անող չեմ: Հարցը տվեք նրան, ով այդ լրատվությունը ներկայացրել է: Այն, ինչ տեսել եմ համացանցում, կարող եմ ասել, որ ոստիկանության գործողությունները իրավաչափ էին, համարժեք, որովհետև մահակներ կային, խուճապի երանգ ունեցող գործողություններ՝ պայթուցիկների միջոցով: Էլ ի՞նչ պետք է աներ ոստիկանությունը»,- զարմացավ նա՝ հավելելով, որ իր կարծիքով՝ դա քաղաքական ակցիա չէր: Քաղաքական ակցիան, ըստ պատգամավորի, թույլատրված է օրենսդրությամբ, լինում է խաղաղ երթերի, բողոքի այլ ակցիաների միջոցով, բայց չի լինում «սենց, ինչ-որ սարքած պայթուցիկներով, մահակներով, դեմքերը փակած» վիճակում:
Պատգամավորին դուր չեկավ այն դիտարկումը, թե այդ գործողությունները հեղափոխության փորձ էին, որի պահանջը հասարակությունն ունի: «Գիտե՞ք ինչ կա… ոստիկանությունն ամեն ինչ անում է, որ հասարակությունը տվյալ պարագայում լինի անվտանգ: Խնդիր կա անվտանգության: Որևէ մեկը նրանց չի արգելել կազմակերպել նստացույց, միտինգ, ներկայացնել իրենց…»,- ասաց նա:
