Վրաստանի նորընտիր նախագահ Գեորգի Մարգվելաշվիլիի երդմնակալությունը տեղի կունենա կիրակի՝ նոյեմբերի 17-ին: Թբիլիսիում չեն սպասում Մոսկվայից պաշտոնական պատվիրակությանը. Ռուսաստանի և Վրաստանի միջև դիվանագիտական հարաբերությունները դեռևս վերականգնված չեն:
Արարողությանը հրավիրված է հեռացող նախագահ Միխեիլ Սաակաշվիլին: Չնայած այն բանին, որ նրա դեմ են հանդես եկել իշխող «Վրացական երազանք» կոալիցիայի առաջնորդները, նրա ներկայությունը երդմնակալության արարողությանը պահանջել են արևմտյան երկրները: Այս մասին գրում է Kommersant-ը:
Օրերս ԱՄՆ դեսպան Ռիչարդ Նորլանդը հայտարարել էր, որ Վրաստանի օտարերկրյա գործընկերների համար կարևոր է ժողովրդավարական ընտրությունների ուղով իշխանության խաղաղ փոխանցման նախադեպը:
Այն մասին, թե ինչպես կանցկացվի երդմնակալությունը, լրագրողներին պատմել է արտգործնախարար Մայա Փանջիկիձեն: «Արարողությունը չի լինի պերճաշուք: Այն կկայանա մայրաքաղաքի Ռուսթավելի պողոտայում՝ հին խորհրդարանի ներքին բակում»,- ասել է նախարարը:
Նրա խոսքով՝ երդմնակալությունից հետո Մարգվելաշվիլին կուղևորվի Հերոսների հրապարակ, որտեղ ծաղկեպսակ կդնի Վրաստանի տարածքային ամբողջականության համար մարտերում ընկածների հուշահամալիրին: Այն կառուցվել է 2010 թվականին՝ 2008-ի օգոստոսի հնգօրյա պատերազմի զոհերի հիշատակին:
Երդմնակալության արարողությունը կավարտվի համերգով և օտարերկրյա հյուրերի մասնակցությամբ ընդունելությամբ: Հրավերք է ուղարկվել 70 երկրի:
