Նախագահական նստավայրում ավարտվել է ՀՀ Նախագահ Սերժ Սարգսյանի հրավիրած խորհրդակցությունն Ազգային ժողովի խորհրդի անդամների հետ: Հանդիպումից հետո պատգմավորները չցանկացան մանրամասնել, թե Նախագահի մոտ կայացած խորհրդակցությանն ինչ հարցեր են քննարկել:
Միայն ԱԺ ՀՅԴ խմբակցության ղեկավար Արմեն Ռուստամյանը նշեց, որ քննարկել են կառավարման խորհրդարանական համակարգին անցում կատարելու հետ կապված հարցեր, սակայն այլ մանրամասներ չհաղորդեց:
ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը ևս հրաժարվեց մեկնաբանություն տալ: «Նախագահի մամուլի ծառայությունը կտեղեկացնի»,- ասաց պատգամավորը` պատասխանելով հարցին, թե ինչ հարցեր են քննարկել խորհրդակցության ընթացքում:
ԱԺ պետական-իրավական և մարդու իրավունքների պաշտպանության հարցերի մշտական հանձնաժողովի նախագահ Հրայր Թովմասյանն էլ նշեց, որ քննարկվել են շատ հետաքրքիր հարցեր:
Խորհրդակցությանը չի մասնակցել Ազգային ժողովի «Ելք» խմբակցության ղեկավար Նիկոլ Փաշինյանը, ով ևս Ազգային ժողովի խորհրդի անդամ է` որպես խորհրդարանական խմբակցության ղեկավար:
