«Մենք հիմա անում ենք ամեն ինչ, որպեսզի ռուսական լրատվամիջոցներով պաշտոնական հաղորդագրություն գնա, որ հայերը այդ օրվա միջադեպի, կրակոցների ու սպանության հետ ոչ մի կապ չունեն»,- «Առաջին լրատվական»-ի հետ զրույցում ասաց Կրասնոդարի հայ համայնքի գործերի համակարգող Ալեքսեյ Հովհաննիսյանը։
Հիշեցնեք, որ նույնվարի 7-ին ՌԴ-ի Կրասնոդարի երկրամասում ավտոմատով զինված տղամարդը կրակ էր բացել Լադոժսկայա կայարանի «Օգոնյոկ» սրճարանում, ինչի հետևանքով սպանվել է տեղի հայ համայնքի երկու անդամ՝ Ռոման Սիրակոսյանը և Արտյոմ Միրզոյանը: Միջադեպի հետևանքով սպանվել էր նաև գնչուական համայնքի մեկ ներկայացուցիչ: Կրակ բացած տղամարդը ձերբակալվել է։ Նա 33-ամյա կազակ ատաման Ալեքսանդր Սիտավիչուսն է:
Հովհաննիսյանը նշեց, որ և՛ կրակողը, և՛ վիճաբանության մասնակից գնչուները արդեն ձերբակալված են, բայց հիմա իրենց համար կարևորը այն է, որ վերջ դրվի խոսակցություններին, թե հայերը ևս վիճաբանության կողմ են եղել։ «Երեկ մենք հանդիպել ենք երկրամասի ներկայացուցիչների, աշխատակազմի ղեկավարի հետ, այսօր ևս հանդիպում է սպասվում համապատասխան պաշտոնյաների հետ։ Մեր պահանջն այն է, որ իրենք պաշտոնապես զանգվածային լրատվության միջոցներով տեղեկություն տարածեն, որ հայերը ոչ մի ձևով խառնված չեն եղել այդ միջադեպին։ Որ այն հրահրել են ցիգանները։ Երեկ երկրամասային ադմինիստրացիայի ղեկավարների հետ հանդիպման ժամանակ էլ նրանք նշեցին, որ հայերը ընդհանրապես ներգրավված չեն եղել միջադեպին։ Պարզապես հայերից մեկը այդ սրճարանում աշխատել է դիջեյ, իսկ մյուսը պարզապես սրճարանի հաճախորդ է եղել։ Նախնական տեղեկություններով՝ վիճաբանությունը ռուսների և ցիգանների միջև սկսել է մի աղջկա հասցեին արված ռեպլիկից, սկսել են վիճել, ապա գնացել ու հետ են վերադարձել սրճարան ու սկսել են անկանոն կրակել»,- ասաց Հովհաննիսյանը՝ հավելելով, որ ակնհայտ է, որ կրակողները ալկոհոլի ազդեցության տակ են եղել, քանի որ չեն նայել, թե ուր են կրակում, ում վրա են կրակում։
Մեր դիտարկմանը՝ միջադեպից հետո խոսվում է, որ հայե՞րն են հրահրել այն, որ իրենք պահանջ են դնում պաշտոնապես հերքելու հայերի մասնակցությունը, Հովհաննիսյանը պատասխանեց. «Գիտեք, քանի որ կազակների հետ հարցեր կան, իրենք ձայն են բարձրացնում, որ իրենց կողմը պահեն, որ մեղավոր դուրս չգան։ Բայց մարդասպանություն է եղել, և հիմա իրենք հարց են բարձրացնում, ձայն են բարձրացնում, ժողովներ են անում, որ հերքեն իրենց մասնակցությունը։ Մենք էլ պահանջում ենք, որ հայերի մասնակցությունը պաշտոնապես հերքվի, որպեսզի միջադեպի ժամանակ այդ ազգային պատկանելիության հարցը փակվի։ Կարևորը այն է, որ մարդ է սպանվել և երկրորդական է, թե ով է սպիտակը, ով՝ սևը։ Կարևոր է նաև, որ մերոնք մասնակից չեն եղել։ Ռուսները եկել ու սևերին սպանել են»։
Մեր զրուցակիցը նշեց, որ հիմա դեռևս քննություն է գնում, ընթացքում այլ հանգամանքներ հայտնի կդառնան, պարզ կլինի կատարվածի պատճառները։ «Պետք է սպասել քննության ավարտին։ Միևնույն ժամանակ չմոռանալ, որ երկու հայերը, ովքեր սպանվել են, ոչ մի կապ չեն ունեցել կատարվածին։ Սրճարանն էլ հայերին չի պատկանել։ Դրա տերը ռուս է»։
